'केपी ओलीसिबें माधव ग्यानपु’
येँ (झीगु स्वनिगः)
भारतया गुप्तचर संस्था 'रअ'या डिजाइन कथं एकीकृत माओवादीयात फसे यायेगु षडयन्त्र म्हितेगुलिइ एमालेया केपी शर्मा ओलीसिबें माधव कुमार नेपाल ग्यानपुया वःगु दु । तसकं हे कलात्मक भाषा छ्यलाः माधव नेपालं न्यागू बुँदाया सहमतियात त्वाःथलाः '१५ दिनया दुने जनसेनाया ल्वाभःया ताःचा सरकारयात लःल्हायेमाल अले उखुन्हुनिसें हे एकीकृत नेकपा -माओवादी)या नायः पुष्प कमल दाहाल प्रचण्डयात प्रधानमन्त्री दयेकाबिइ' धकाः एमालेया हे छम्ह नेतां 'झीगु स्वनिगः न्हिपौ' लिसे खँल्हासें कनादीगु दु ।
अथे ल्वाभःया ताःचा लःल्हाये धुंकाः प्रधानमन्त्री प्रचण्डयात यानाः स्वला लिपा संविधानसभाया म्याद फुइ अले उगु इलय् कांग्रेस व मधेसवादी दलत नाप नापं पुलांपिं राजतन्त्रवादी दलया नेतातय्त साथ कयाः संविधानसभाया म्याद थप मयासे प्रचण्डया इलय् हे संविधानसभा भंग यायेफत धाःसा भारतया डिजाइन कथं ज्या जुइ धकाः अज्वःगु कथंया भूमिका म्हिताच्वंगु दुसा केपी ओलीं तप्यंक हे झलनाथ खनालयात आः थत्थें प्रधानमन्त्रीं राजीनामा बिइमाः धयाच्वंगु दु धकाः एमालेया छम्ह नेतां धयादीगु दु । थ्व हे झ्वलय् थौं मंगलवाः ११ बजेनिसें पार्टीया केन्द्रीय ज्याकू बल्खुइ एमालेया केन्द्रीय कमिटीया मुँज्या जुइगु नापं उगु मुँज्याय् विशेष यानाः माधव—ओलीं पार्टीया नायः झलनाथ खनालयात राजीनामाया नितिं ब्यापक रुपं दबाव बिइगु ज्या यायेगु तकं तयारी याःगु सीदुगु दु ।
