अन्यौलताया दथुइ त्वःतेगु जुइमखु : प्रम खनाल

येँ (झीगु स्वनिगः)

प्रधानमन्त्री झलनाथ खनालं अन्यौल व कामचलाउ अवस्थाय् राष्ट्रिय सहमतिया आधारय् न्हूगु विकल्प तयार मजुइकं थःम्हं गुगु नं हालतय् राजीनामा बिइगु जुइमखु धकाः धयादीगु खः । राष्ट्रिय सहमतिया आधार तयार जुइवं थःम्हं लँपु चायेकाबिइगु जुइ धयादिसें वय्कलं धयादिल 'संविधानसभां थप याःगु स्वलाया म्याद तसकं हे अनमोल खः, थुकियात सदुपयोग यायेत राष्ट्रिय सहमतिया वातावरण निर्माण यायेत सरकारी संचार माध्यम नापं आम संचारमाध्यमं महत्वपूर्णगु भूमिका म्हितेमाः ।' म्हिगः सोमवाः संचारमाध्यमया प्रमुख नापं सम्पादतकलिसे थःगु हे ज्याकू सिंहदरवारय् खँल्हाबल्हा यायेगु झ्वलय् प्रधानमन्त्री खनालं अथे धयादीगु खः ।

वंगु जेठ १४ गते चान्हय् संविधानसभा विघटन याइगु शक्तित नं खने दत धकाः नं प्रधानमन्त्री खनालं धयादिल । वय्कलं अज्वःगु शक्ति छु छु खः धकाः स्पष्ट यानामदी । संचारकर्मीतलिसे खँ ल्हायेगु झ्वलय् धयादिल 'न्यायू बुँदाया सहमति निर्माणया झ्वलय् छथ्वः तत्वत संविधानसभा विघटन यायेगु नितिं माःगु कथं तयारी यानाः न्ह्याःवंगु बांलाक हे खने दत । गुलिसिनं बिखण्डनकारी धारणा तकं तल तर नेपाःमि जनतां संविधानसभाया माध्यमं हे संघीय लोकतान्त्रिक गणतन्त्रया न्हूगु संविधान जारी यायेमाः धकाः स्पष्ट जनादेश व अभिमत ब्यूगुलिं चच्छि न्हिच्छि सहलह यानाः नं संविधानसभाया म्याद थप यायेगु निर्णय यायेफुगु खः ।' वय्कलं न्ह्याथेजाःगु पंगः वःसां नं शान्ति प्रक्रिया व संविधान निर्माणया ज्या पूवंका त्वःतेगु जुइ उकिया नितिं जनतां खबरदारी यायेमाःगु आवश्यकता दु धयादिल ।