न्याम्ह नेता चान्हय् गन वंगु?
येँ (सन्ध्या टाइम्स)/ संविधानसभाया म्याद थपया विषयय् मू मू राजनीतिक दलया नेतातय् दथुइ संविधानसभाया भवन न्हूवानेश्वरय् तसकं बहस जुयाच्वंगु इलय् लाक्क बाचा इलय् आकाझाकां एमालेया न्याम्ह नेतात खुरुखुरु पिहां वन। वनेत ला वय्कःपिं कोटेश्वरस्थित माधव नेपालया छेँय् वनेगु धकाः वंगु खः, तर वंबलय् बानेश्वरया मेगु हे छखा छेँय् स्वात्त दुहां वन। सुयात नापलायेत अन वंगु खः,सुनां नं मसिउ ।
तर विज्ञ सूत्रं बिउगु जानकारी कथं वय्कःपिं अन भारतया गुप्तचर संस्था 'र' या एजेण्टतय्त नाप लायेत अन वंगु खः। अन बाघौ तक जूगु सहलह लिपा तिनि दलतय् दथुइ न्यागू बुँदाया सहमति जूगु खः। वकुन्हु चान्हय् १२ बाजे एमालेया नेतात माधव नेपाल, केपी ओली, महासचिव ईश्वर पोखरेल, सचिव युवराज कार्की व रक्षा मन्त्री विष्णु पौडेल संविधानसभा भवनं पिहां वःगु खः ।
'र'या प्रतिनिधितय्त नापलानाः सहमति पती प्रधानमन्त्रीया राजीनामा व मधेसया मुद्दायात दुथ्याकेगु प्रस्ताव यंकाः उकी हस्ताक्षर याकेत वय्कःपिं ताःलाःगु सूत्रया दावी दु। संविधानसभा भवन दुने म्याद थपे यायेगु खँयात कयाः ताःहाकः विवाद जुयाच्वंगु इलय् वानेश्वर लागाया हे छगू होटल व स्वखा छेँय् 'र'या प्रतिनिधित च्वनाच्वंगु दावी नं सूत्रं याःगु दु ।
एमालेया नेतात इपिं च्वनाच्वंगु छखा छेँय् वनाः सहलह ब्याके धुंकाः जक हाकनं संविधानसभा भवनय् वयाः न्यागू बुँदाया सहमति याकूगु खँ नं सूत्रं धाःगु दु। थुगुसी 'र'या नेतृत्व यानाः आलोक जोशीं थन अड्डा जमे याःगु सूत्रया दावी दु। उपिं ज्या सिधयेकाः म्हिगः लिहां वनेधुंकूगु दु।
वर्तमान प्रधानमन्त्री झलनाथ खनालयात राजीनामा बीकाः थःगु पक्षय् दुम्ह प्रधानमन्त्री दयेकेगु योजना कथं हे 'र'पाखें तयार याःगु डिजाइन कथं न्यागू बुँदाया सहमति जूगु खँ धाःगु दु ।
संविधानसभाया म्याद फुइगु छवाः न्ह्यवंनिसें हे 'र' या प्रतिनिधित येँय् च्वनाः सरकारया पक्षय् दुई तिहाई बहुमत खाके मबीकेगु नितिं मधेसी जनअधिकार फोरमयात कुचा यानाः फोरम गणतान्त्रिक गठन याके बिउगु खः। यदि फोरम तछ्याये मफुगु जूसा सरकारयाके दुई तिहाई बहुमत दइगु अले उकिं हे न्ह्यागु नं निर्णय याना वनेफु धइगु तायेका 'र' या मनूत सक्रिय जूगु खः ।
तर भारतया योजना कथं मधेसवादीतय्गु मोर्चायात तटस्थ तयाः नं मधेसीतलिसे जूगु सहमति कार्यान्वयन यायेगु जुइ धकाः न्यागू बुँदाय् दुथ्याकेगु ज्यां यानाः भारत सफल जूगु खने दु धकाः मनूतय्सं टिप्पणी यानाहःगु दु ।
