दवावया रणनीति दयेकेत कांग्रेसया बैठक

येँ (सन्ध्या टाइम्स)/स्वंगू दल एकीकृत माओवादी, नेपाली कांग्रेस व एमालया दथुइ न्यागू बुँदाया सहमति जुयाः संविधानसभाया म्याद स्वलाया निंतिं थप जुइ धुंकूगु अवस्थाय् आः सहमति जूगु बुँदायात कार्यान्वयन याकेत सरकार, माओवादी व एमालेयात दबाव बीगु निंतिं रणनीति तयार यायेत थौं नेपाली कांग्रेसया पदाधिकारीतय्गु बैठक च्वनीगु जूगु दु ।

पार्टीया सभापति सुशील कोइरालाया छेँ महाराजगन्जय् कांग्रेस पदाधिकारी नापं प्रभावशाली नेतातय्गु उगु बैठक च्वनेत्यंगु खः। विशेष यानाः न्यागू बुँदाय् हे उल्लेख जुयाच्वंगु प्रधानमन्त्रीया राजीनामाया सवालय् प्रधानमन्त्री झलनाथ खनाल नापं माओवादीया नेतातय्सं राष्ट्रिय सहमति जुइधुंकाः जक राजीनामा बीगु धकाः सार्वजनिक रुपं न्ववानादीगु नापं पार्टीं संविधानसभाया म्याद थप यायेत सर्तया रुपय् न्ह्यब्वःगु १० बुँदापाखें नेतृत्व अन्तिम इलय् वयाः लिचिल धकाः पार्टीया हे नेता कार्यकर्तातय्सं आलोचना यानाहःगु विषययात कयाः बैठकय् सहलह जुइ धकाः कांग्रेसया छम्ह नेतां धयादीगु दु। न्यागू बुँदायात कार्यान्वयन याकेत वर्तमान सरकार, माओवादी व एमालेयात दबाव बीगु निंतिं मधेसवादी दलत नापं सरकारय् मदुगु पार्टीतय्गु नं साथ कायेमालीगु जुयाः गुकथं समन्वय याना वनेगु धइगु खँय् नं सहलह जुइ धाःगु दु। बैठकय् न्हूगु संविधान, शान्ति प्रक्रिया, सेना समायोजनया सवालय् गुकथं भूमिका म्हितेगु धइगु बारे नं सहलह जुइ ।