चित्तधर बुदिंया लसताय् किपा धेंधेंबल्लाः
येँ (सन्ध्या टाइम्स)/ङत तुलाधर समितिया ग्वसालय् वंगु शनिवाः कविकेशरी चित्तधर 'ह्दय' या १०५ दँ बुदिंया लसताय् छगू ज्यझ्वःया दथुइ किपाः धेंधेंबल्लाः ज्याझ्वः जुल । ज्याझ्वलय् छगूनिसें झिगू तगिं तकया ब्वँमिपिंसं ब्वति काःगु खः ।
ङत तुलाधर समितिया नायः सागरमान तुलाधरया सभापतित्वय् न्ह्याःगु उगु ज्याझ्वलय् ग्वसाः खलःया सल्लाहकार सुवर्णमान तुलाधरं कविकेशरी चित्तधर 'हृदय' या बारे ध्वाथुइक कनादीगु खः। वय्कलं कवि 'हृदय' छम्ह कवि जक मखुसें छम्ह चित्रकार व बहुआयामिक साहित्यकार नं खः धयादिल ।
किपा धेंधेंबल्लाः कासाया ल्यज्या पुचलय् चिनीकाजी ताम्राकार, प्रकाश मान तुलाधर, प्रचण्ड बानियाँ च्वनादीगु खः। मुक्कं नीनिम्ह ब्वँमिपिंसं ब्वति काःगु उगु कासा १-५ व ६-१० तगिं यानाः निगू पुचलय् न्ह्याकूगु खः। कासाय् १-५ तगिमय् प्रबुद्धमान तुलाधर न्हाप, कुशलसिद्धि तुलाधर लिउ, सुज्ञान तुलाधर लियांलिउ व उपकमान तुलाधरं हःपाः सिरपाः त्याकूगु खःसा ६-१० तगिं पुचलय् नेशमा तुलाधर न्हाप, प्रतीकमान तुलाधर लिउ, रुसाल तुलाधर लियां लिउ व सिर्वा तुलाधर हःपाः सिरपाः त्याकेत ताःलाःगु खः ।
ज्याझ्वलय् छ्यांज्ये अनिलरत्न तुलाधरं वार्षिक प्रतिवेदन न्ह्यब्वयादीगु खःसा न्वकु त्रिरत्न तुलाधरं लसकुस यानादीगु खः। त्वाः थाकुलि जगतसिद्धि तुलाधरयात ग्वसाः खलःया नायः सागरमान तुलाधरं हनेज्या नं यानादीगु खः ।
