झिद्वः मधेसी सेना बारे कांग्रेसया बिचाः छु?

नेपाली सेनाय् आः तुरुन्त हे झिद्वः मधेसी जनतायात मंकाः कथं समावेश याकेमाः धइगु माग मधेसी मोर्चां न्ह्यःने हःगु दु। माओवादी लडाकुतय् समायोजन याये फइगु सम्भावना सतिना वयेवं मधेसी मोर्र्चां आकाझाकां वयाः थज्याःगु माग न्ह्यःने हःगु खः। थौं थ्व मागयात छुं मखु थें धकाः त्वःता तःसां मधेसी जनताया भावनालिसे स्वाःगु माग जूगुलिं कन्हय् मधेसी जनतां थुकियात हे प्रमुख माग दयेकाः न्ह्यःने महइ धाये मफु ।

नेपाली सेना आः सरकारय् दुगु माओवादी व एमालेया सेना मखु। थ्व नेपाःया फुक्कं निकायया मंकाः सेना खः। आः सरकारय् दुगु माओवादी व एमालें उगु मागयात वेवास्ता याःगु कारणं थ्व निगू पार्टी उकिया पक्षय् मदु धइगु ला प्रस्ट हे जुल। तर थ्व माग तयाच्वंपिं मधेसीलिसे हे अघोषित मोर्चा दयेकाः न्ह्यःने वयाच्वंगु प्रमुख प्रतिपक्षी नेपाली कांग्रेसया बिचाः चाहिं थुकिया बारे छु खः, व आः तक सी मदुनि। थुगुसी संविधानसभाया म्याद थपे यायेगु वा मयायेगु धइगु सवालय् थज्याःगु माग तयाः न्ह्यःने वयाच्वंपिं मधेसी पार्टीयात हे कांग्रेसं पाचिंगुलिं झिद्वः मधेसीयात सेनाय् दुथ्याकेमाः धइगु माग प्रति नं कांग्रेसया समर्थन हे दु धइगु अनुमान जुइ। देशय् परिवर्तनया लागिं ज्यानया बाजी तया वःपिं न्याद्वः माओवादी गुरिल्लायात सेनाय् दुथ्याके मखु धाःम्ह कांग्रेसं झिद्वः मधेसीयात सेना दुथ्याकेगु मागयात गय् यानाः समर्थन यात? थ्व ला देशय् जुइत्यंगु सेना समायोजनया ज्याय् कांग्रेसं तप्यंक हे तये हःगु पंगः मखु ला? सेना समायोजनय् थम्हं पंगः तयेगु अले समायोजन याकनं यायेमाल धकाः मेपिंत दोष बीगु कांग्रेसया नियत छु खः?

More Stories Like this