खालि बर्मू नेतात जक

विशाल कायस्थ, युके

संविधानसभाया म्याद थपे यायेगु लागिं जुइमा अथवा माओवादी समस्या समाधान यायेगु लागिं जुइमा अथवा छगू न्ह्यागु हे विषययागु महत्वपूर्ण बैठक जुयाच्वंगु थासय् जुइमा, थौंन्हकय् बैठक जुयाच्वन धाइबलय् उगु बैठकय् ब्वति कयाच्वंपिं नेतातय्गु ख्वाःपाः छकः छिकपिंसं गबलें स्वयादियागु दु ला? अज्याःगु बैठकय् ब्वति कयाः बिचाः बीपिं नेता धाःपिं फुक्क हे बर्मूया बर्मू जक जुयाच्वनी। पुष्पकमल दाहाल, मोहन वैद्य, बाबुराम भट्टराई, सीपी गजुरेल, सुशील कोइराला, रामचन्द्र पौडेल, कृष्णप्रसाद सिटौला, डा. रामशरण महत, डा. मिनेन्द्र रिजाल, माधव नेपाल, केपी ओली, झलनाथ खनाल, ईश्वर पोखरेल, युवराज कार्की, शंकर पोखरेल, भीम रावल आदि आदि। फुक्क हे बर्मूया बर्मूत जक। वास्तवय् थ्व वार्ता व बैठक गबलें हे सफल मजुयाच्वंगुया छगू मूख्य कारण नं थ्वहे खः। थ्व खँया बारे गबलें सुं मनूतय्सं गहिरे जुयाः चिन्तन यानाः स्वःगु दु ला?

बर्मूया बर्मू जक च्वनाः वार्ता यात धाःसा गबलें हे सफल जुइ मखु। छाय्धाःसां बर्मू धइपिं तसकं लोभी जुइ। फुक्कं बर्मू लोभी मजुइफु। तर थौंतक राजनीतिइ खने दुपिं सुं नं बर्मू लोभं मुक्त खने मदु। आःयापिं ला लोभी जक मखु पापी नं खः। थुमिसं थःत व्यक्तिगत रुपं फाइदा जुइगु खँ पिहां मवःतले गबलें नं त्वःती मखु। थ्व छगू म्वाःल का धकाः त्याग यायेगु थुमिके बानी हे मदु। उखुन्हु जेठ १४ गते चान्हय् संविधानसभा भवनय् बैठक यायां थम्हं धाः थे खँ मिले मजुल धकाः एमालेया न्याम्ह नेतात वार्ता त्वःताः खुरुखुरु पिहां वल। उपिं न्याम्हं बर्मू खः-नेपाल, ओली, पोखरेल, कार्की व पौडेल। संविधानसभा हे कायम जुइ लाकि जुइ मखु धकाः संकट पिहां वयाच्वंगु इलय् थ्व न्याम्ह बर्मू नेतात छगू चीधंगु खँय् चित्त बुझे मजुइवं बैठक हे त्वःताः खुरुखुरु पिहां वयाः माधव नेपालया छेँय् वनाः गोप्य बैठक याः वन। बर्मू नेता धइपिं थथे लोभी जुइ। माओवादी दुने गबलें नं नारायण श्रेष्ठ, रामबहादुर थापा बादल धाःपिंसं ल्वापु पिकाःगु खँ दु ला? कांग्रेसय् गबलें नं प्रकाशमान सिंह, भिमसेनदास प्रधानं ल्वापु पिकाःगु खँ सिउला? एमाले दुने गबलें नं साहना प्रधान, सुभाष नेम्बाङं कचकच याःगु इतिहास दु ला? पार्टी दुने जुइमा कि पिने जुइमा, कचकच याइपिं, खँ मिले मयाइपिं, कलह पिकाइपिं फुक्क हे बर्मू नेतात जक खः ।

न्ह्यागु पार्टीइ स्वयादिसँ, आन्तरिक ल्वापु नं बर्मू नेताया दथुइ जक दु। एमालेय् स्वःसा खनाल व ओलीया ल्वापु, माओवादीइ स्वःसा भट्टराई व दाहालया ल्वापु, कांग्रेसय् स्वःसा कोइराला व देउवाया ल्वापु। थःथः ला थथे मदु मदुगु ल्वापु पिकाइपिं बर्मू नेतात वार्ताय् च्वनाः दयाच्वंगु ल्वापु मदयेके फइ ला?

More Stories Like this