'हाकनं स्वला थप यायेत आःया नितिं स्वला म्याद थप’
येँ (झीगु स्वनिगः)
आः स्वलाया दुने संघीय गणतान्त्रिक नेपाःया न्हूगु संविधानया मस्यौदा दयेकाः जनतायाथाय् यंकेगु अले व हे ईया दुने शान्ति प्रक्रिया पूवंकेगु धकाः संविधानसभाया ततःधंगु स्वंगू दलया दथुइ सहमति जूगु धैगु अन्ततः हाकनं स्वला म्याद थप यायेगु नितिं हे खः धकाः मनूतय्सं धयाहःगु दु । स्वलाया दुने न्हूगु संविधानया मस्यौदा दयेकाः जनतायाथाय् यंके धुंकाः जनतापाखें वःगु सुझावयात दुथ्याकाः संविधानसभां बुँदागत रुपं निर्णय यायेमाःगु जुयाः हे हाकनं स्वला म्याद थप याइगु निश्चित दु । आः थत्थें हे संविधानसभाया म्याद खुलाया म्याद थप धकाः मधासे स्वला लिपा हाकनं स्वालाया म्याद थप यायेगु योजना कथं हे स्वंगू दलया नेतातय् दथुइ न्यागू बुँदाया सहमति जूगु खः धकाः मनूतय्सं टिप्पणी यानाहःगु दु ।
म्हिगः आइतवाः न्यागू बुँदाया सहमति धुंकाः संविधानसभाया म्याद स्वला थप याये धुनेवं संविधानसभा भवन पिने न्हू बानेश्वरय् संचारकर्मीतलिसे खँ ल्हायेगु झ्वलय् एकीकृत नेकपा -माओवादी)या नायः पुष्प कमल दाहाल प्रचण्डं नं स्वला लिपा हाकनं स्वला म्याद थप यायेगु जुइ धकाः धयादीगु दु । थःपिन्सं तसकं हे मेहनत यानाः आःया नितिं स्वलाया म्याद थप यानागु खः धासें थ्व स्वलाया दुने मेगु स्वलाया म्याद थप यायेगु तयारी यायेगु जुइ धकाः धयादिल । एकीकृत माओवादीया नायः प्रचण्ड, नेपाली कांग्रेसया सभापति सुशील कोइराला व एमालेया नायः नापं प्रधानमन्त्री झलनाथ खनालं ल्हाःचिं तयाः पिथंगु न्यागू बुँदाया सहमति पौ तयार यानाः जक संविधानसभाया म्याद थप यायेगु ज्या जूगु खः ।
स्वंगू दलया शीर्ष नेतातय्सं ल्हाःचिं तयादीगु उगु सहमति पतिइ स्वलाया दुने शान्ति प्रक्रिया पूवंकेगु, संविधानया न्हापांगु मस्यौदा तयार यायेगु, नेपाली सेनायात समावेशीकरण यायेगु व राष्ट्रिय सहमतिया सरकार दयेकेगु नितिं प्रधानमन्त्रीं राजीनामा बिइगु खँ न्ह्यथनातःगु दु ।
