'शान्तिपूर्ण क्रान्तिया उपलब्धी गणतन्त्र’

देय्न्यंकं गणतन्त्र दिवस तःजिक हन

येँ (झीगु स्वनिगः)

देय्न्यंकं हे म्हिगः आइतवाः गणतन्त्र दिवस थीथी ज्याझ्वः यानाः हंगु दु । येँया सैनिक मञ्चय् गणतन्त्र दिवसया लसताय् विशेष समारोह जुल । उगु समारोहलय् प्रमुख अतिथिया रुपय् राष्ट्रपति डा. राम वरण यादव, उप राष्ट्रपति परमानन्द झा, प्रधानमन्त्री झलनाथ खनाल, सभामुख सुवासचन्द्र नेम्वाङ, प्रधानसेनापति, मन्त्रीत, सभासदपिं, निजामति कर्मचारी, व्यवसायी व सर्वसाधारण मनूतय्गु उपस्थिति दुगु खः । गणतन्त्र दिवसया लसताय् शान्तिया प्रतिक तुयुपिं बःखुंत ब्वयेकेगु ज्या जूगु खः ।

अथे हे सेनाया हेलिकप्टरपाखें 'गणतन्त्र दिवस २०६८' धकाः च्वयातःगु ब्यानर ब्वयेका चाःहिइकेगु नापं स्वांवाः गायेकेगु ज्या तकं जूगु खः । अथे हे बेलुन तकं ब्वयेकेगु ज्या जूगु खः । उगु ज्याझ्वलय् नेपाल प्रहरी, नेपाली सेना, शसस्त्र प्रहरीवलपाखें मार्चपास, स्काउट व टुकडी थानाः दिवसयात आकर्षण याःगु खः । उगु दिवसय् नेपाःया आदिवासी जनजाति नापं थीथी जात जाति व समुदायपाखें थःथःपिनिगु मौलिक संास्कृतिक झाँकी तकं ब्वज्या याःगु खः ।

उगु समारोहलय् न्वंवासें प्रधानमन्त्री झलनाथ खनालं शान्तिपूर्ण जनक्रान्तिया उपलब्धि धैगु हे संघीय लोकतान्त्रिक गणतन्त्र खः धासें उकियात आः कार्यान्वयन यायेमाःगु ई वःगु दु धयादिल । वय्कलं लोकतान्त्रिक गणतन्त्रयात संस्थागत यानाः परिवर्तनपाखें वःगु उपलब्धीया रक्षा व आन्दोलनया सहिद नापं योद्धातय्गु अठोट पूरा यायेत सरकारपाखें प्रण याये धकाः नं धयादिल । एमालेया नायः तकं जुयादीम्ह प्रधानमन्त्री खनालं वर्तमान अवस्थायात क्रान्तिलिपाया संक्रमणकालिनया संज्ञा बियादिसें शान्तिप्रक्रियाया पूर्णता व संविधान च्वयेगु ज्यायात राष्ट्रिय सहमति व अर्जुनदृष्टिया आधारय् पूरा यायेमाःगु आवश्यकता दु धकाः नं धयादिल ।