आः चुनावया इलय् प्रम जुइगु दाउ
येँ (सन्ध्या टाइम्स)/संविधानसभाया म्याद बल्लतल्ल स्वला थपे जुइवं आः न्हूगु संविधान जारी जुइधुंकाः वयां लिपा जुइगु चुनाव सम्पन्न याइगु सरकारया नेतृत्व यायेत माओवादी व कांग्रेस नेतातय् दथुइ धेंधेंबल्लाः शुरु जूगु दु।
म्हिगः स्वंगू दलया शीर्ष नेतातय्गु मुँज्या जूगु इलय् कांग्रेस व माओवादीं उज्वःगु धारणा तःगु खँ वार्ताय् दुथ्याःम्ह एमालेया छम्ह नेतां धयादीगु दु ।
निगुलिं दलं यदि पालंपाः प्रम जुयाः न्ह्याः वनेगु खःसा राष्ट्रिय सहमतिया सरकारया नेतृत्व संविधान जारी यायेगु इलय् सिबें चुनावया इलय् सरकारया नेतृत्व याये दत धाःसा थःगु दलयात फाइदा दइ धकाः उकथंया प्रस्ताव याःगु खँ नं वय्कलं कनादीगु दु। पालंपाः प्रम जुइगु खत धाःसा संविधानसभाया म्याद थप जूगु इलंनिसें न्हूगु संविधान जारी मजूनिगु इलय् तक छगू पार्टीया नेतृत्वय् अले अनं लिपा न्हूगु चुनाव तकया नितिं मेगु दलया नेतृत्वय् सरकार दयेकेगु कथं न्ह्याः वनेगु खँय् सहमति जूसां चुनावय् थःथःपिं सरकारय् च्वन धाःसा यक्व सिट त्याके फइ धकाः तायेकाः निगू हे दलया नेतातय्सं उज्वःगु प्रस्ताव हःगु खँ नं धाःगु दु ।
