सकारात्मक सोचं राजनीति यायेमाः

डी.आर.खड्गी

राज्य संयन्त्र पतनया लँय् वनाच्वन कि देश अस्थिरता, अराजकता व अस्तव्यस्ताया अवस्थां न्ह्याः वनी। झीथाय् राज्य संयन्त्र पतनया लँपुइ वनाच्वंगुया प्रमुख कारण खः अपराधी, ढोंगी व चापलुसीतय्सं राजनीतिइ पकड कयाच्वंगुलिं। थुकिं यानाः राजनैतिक पार्टीत बेइमानी व भ्रष्टाचारय् डुबे जुयाच्वंगु खः। जब राजनैतिक पार्टी नकारात्मक व्यक्तितय्गु ल्हातय् लानाच्वनी व समाजय् पशु स्वभावया व्यक्तितय्सं राज यानाच्वनी। थुलि जक मखु चरित्रहीन व्यक्तितय्त नं राज्यया अधिकार बीगु यानाच्वनी। थज्याःगु राज्य व्यवस्थायात विदेशी शक्तिं आक्रमण यानाः ध्वस्त यायेमाःगु आवश्यकता मदु। छाय्धाःसा व राज्य व्यवस्था सुनानं छुं हे याये म्वायेक थःहे ध्वस्त जुजुं वनाच्वनी। झीगु देय् ध्वस्त जुजुं वनाच्वंगुया कारण संविधानसभाय् मूर्खतय् हुलं राज्यया धुकू स्वाहाः यानाः चरित्रहीन व्यक्तितय्सं राज्य संचालन यानाच्वंगुलिं खः। थ्व हे कारणं यानाः झीगु देय्यात विदेशी शक्तिं आक्रमण याये म्वायेकं अथें हे ध्वस्त जुजुं वनाच्वंगु खः ।

जनतां धायेगु नं याना वयाच्वंगु दु कि देशय् कलियुग सुरु जुयाच्वंगु दु। कलियुग सुरु जुयाच्वंगुलिं देशय् हत्या, हिंसा, अपराधी नं अप्वयाच्वंगु हुनिं खः धाइ। अझ थुलि जक मखु जनता अति कष्टपूर्ण जीवन हनेत बाध्य जुयाच्वंगु दु। वास्तवय् कलि युग व सत्य युग धयागु इलं हइगु मखु थ्व ला नेतातय्सं हइगु खः। यदि भिंम्ह शासकया ल्हातय् देशया सत्ता लात धाःसा व शासकं देशयात सत्य युगय् यंकी। थौं झीगु देशय् मभिंपिनिगु ल्हातय् सत्ता लानाच्वंगुलिं इमिसं कलि युगया अवस्था हयाः पूरा देशय् अशान्ति व द्वन्द्वया अवस्था ब्वलनाच्वंगु दु। झीगु देशय् न्हापा राजनीति याइपिं नेतातय्सं भिजन ज्वनाः देश व समाजया विकास यायेगु उद्देश्य ज्वनाः राजनीति यानाच्वनी। जब राजनीति खसब्रम्हूतय्गु ल्हातय् लाः वन इमिसं राजनीतियात अराजनीतिया लँपुइ यंकाच्वन। अराजनीति वनाच्वंगुलिं देशयात स्यंकाः थःगु जाति व परिवार अति धनी जुइगु लागि कुकर्म यानाच्वनी। खसब्रम्हू जातियाके राजनीतिक संस्कार खने मदु। इपिं अहंकार व साम्प्रदायिक पक्षधर खः। इपिं साम्प्रदायिक जुयाच्वंगुलिं हे देशया फुक्क अंग प्रशासनिक व न्याय क्षेत्रय् कब्जा यानाच्वंगु खः। दसुया निंतिं नेपाःया ७५ म्ह सिडिओ मध्ये ६५ म्ह ला खसब्रम्हू जक हे जुयाच्वंगु दु। नेपाः सरकारया उच्च तहया सचिव पदय् नं ९० प्रतिशत खसब्रम्हू जातिं हे कब्जा यानाच्वंगु दु। अझ भविष्यय् झीगु देश यक्व स्यना वनीगु सम्भावना खनेदु। छाय्धाःसा खसब्रम्हूतय् नापनापं विहारी मूलया मधेशीतय्सं नं राजनीतिया नामं सत्ताय् वनाः देशया सम्पत्ति लुटे यानाच्वंगु दु ।

झीगु धापू विदेशीमूलया नेपाली नागरिकं देशय् राजनीति हे याये मजिउ धयागु मखु। विदेशी मूलया नागरिकं राजनीति याये जिउ तर भिंपिं, सकारात्मक व्यक्तितय्सं राजनीति यात धाःसा जक इमित लसकुस याये फइ। सकारात्मक सोच ज्वनाः राजनीति यानाः देश विकास यानाच्वंपिं विदेशी मूल यक्व देशय् मदुगु मखु। दसुया निंतिं छगू देश मारिशस खः। थ्व अफ्रिकाया पूर्व भागया चीधंगु राष्ट्र खः। थ्व देश न्हापा फ्रान्सया उपनिवेशय् लानाच्वंगु खः। लिपा फ्रान्सयात हटे यानाः अंग्रेजया उपनिवेशय् लाः वन। सन् १९६८ सालय् अंग्रेज उपनिवेशपाखें मुक्त यानाः देश स्वतन्त्र याःगु खः। थ्व देशया छगू टापु डिएगो गार्सियायात अमेरिकाया सेनां कब्जा याना तःगु दु। मारिशस देशय् भारतीय मूलया व्यापारी अनिरुद्र जगन्नाथं चुनावं त्याकाः देशया उच्च पदय् च्वनाः शासन यानाच्वंगु दु। अनिरुद्र जगन्नाथ भारतीय मूलया नेता जूसां सकारात्मक सोच व भिजन ज्वनाः देश सञ्चालन यानाच्वंगुलिं मारिशसयात प्रगतिया लँपुइ यंकेत सफल जुयाच्वंगु दु। अनिरुद्रयां न्ह्यः मारिशसया प्रधानमन्त्री डा. राम गुलाम खः। राम गुलामं देशयात ठीक ढंगं सञ्चालन यायेत असफल जूगुलिं देशय् बेरोजगारी अप्वया वल। वया नापनापं बजाः भाः तच्वः जुया वनाच्वंगुलिं जनता सरकार खनाः मि जुयाच्वंगु खः। जब भारतीय मूलया लँपुइ वनाः कृषिइ आधारित अर्थतन्त्रयात परिवर्तन यानाः औद्योगीकरणया लँपुइ वनाः देशया आर्थिक अवस्थायात मजबुत याना यंकल मारिशसय् स्वदेशी व विदेशी पूँजीपतितय्सं मध्यम खालया उद्योग सञ्चालन यानाः जनतायात रोजगारी बीत सफल जू वन। न्हापां कुषि उत्पादित वस्तु चिनी जक निर्यात यानाः देशया आर्थतन्त्र सुधार यानाच्वंगु मारिशस आः वयाः पर्यटन विकास सफल रुपं न्ह्याकाच्वंगु दु ।

वित्तीय संस्था व बैंक नं बांलाक सञ्चालन जुयाः देशया अर्थतन्त्रयात तिबः बियाच्वंगु दु। देशया अर्थतन्त्र क्वातुगुलिं १३ लाख जनसंख्या दुगु देशया जनता शन्ति व आनन्दपूर्वक जीवन हनाच्वंगु दु। मारिशसया फुक्क विद्यार्थीयात शिक्षा व स्वास्थ्य निःशुल्क रुपं बियातःगु दु। जनतायात नं रोजगारीया अवसर चूलाका बियाच्वंगुलिं जनतां नं देशया लागि तःधंगु योजदान बियाच्वंगु दु। राष्ट्रपति अनिरुद्रं यानादीगु महत्वपूर्ण ज्यात धइगु विशेष यानाः थथे दु:
क) रक्षा बजेट कम यानाः कल्याणकारी ज्याय् उपयोग यायेत सफल जुल।
ख) प्रजातान्त्रिक संस्था, श्रमिक, सरोकार व रोजगारी दातातय् दथुइ सुमधुर स्वापू कायम यायेत सफल जुल। मेगु महत्वपूर्ण ज्या धइगु राज्यय् विकास यायेत सफल जुयाच्वंगु दु। व खः प्राकृतिक श्रोतया सम्पत्ति बिना नं देश विकास यानाः क्यनेफु धयागु धारणा। राष्ट्रपति अनिरुद्रं बरोबर भाषण बीगु झ्वलय् जनता हे देशया सम्पत्ति खः धकाः धायेगु नं याः। अथे जूगुलिं जनतां देशया लागि कडा परिश्रम याना क्यनेमाः धाइ। राष्ट्रपति अनिरुद्रया वाणीयात जनतां ग्रहण यानाः जनता नं देशया लागि छुं यानाः क्यनेमाः धकाः खुब परिश्रम यानाच्वंगु दु ।

झीगु देशय् स्वार्थी, लोभी खस ब्रम्हू जाति व नकारात्मक सोच ज्वनाः विदेशी मूलयापिंसं मधेशी राजनीति यानाच्वंगुलिं देश ठीक जुइ हे मखु ।

More Stories Like this