आः जूगु सहमति जक लागू जुइ ला?

अन्तिमय् वनाः हे जक महत्वपूर्ण निर्णय यायेगु नेपाली राजनीतिक पार्टीतय् प्रवृत्ति म्हिगः हानं छक्वः लिसा कायेगु ज्या जुल। वंगु छुं न्हि तक लगातार च्वंगु बैठकं नं छुं हे निर्णय याये मफुसेंलि म्हिगः चान्हय् संविधानसभाया म्याद वनेधुंकाः तिनि दलतय् दथुइ न्यागू बुँदाया सहमति जुइत ताःलात। वयांलि चान्हय् हे संविधानसभाया बैठक च्वनाः संविधानसभाया म्याद मेगु खुला थपे यायेगु ज्या जुल ।

नेतातय्सं चांचां बैठक च्वनाः संविधानसभाया म्याद थपे यायेगु निर्णय ला यात, तर शान्ति प्रक्रिया व संविधान दयेकेगु ज्या धाःसा थ्वयां लिपा नं क्वचाइ धइगु आशा यायेगु थाय् मवःनि। छाय्धाःसां सेना समायोजन व संविधान निर्माणया मूलभूत खँय् अझ नं सहमति जूगु मदुनि। सेना समायोजन यायेबलय् माओवादीया गुलि लडाकुयात सुरक्षा निकायय् छ्वयेगु व गुलियात छेँय् लित छ्वयेगु धइगु निर्णय अझं मजूनि। थ्व संख्याया खँय् दलतय् दथुइ स्वलाया दुने नं सहमति जुइ धइगु ग्यारेन्टी मदुनि ।

उखे संविधान दयेकेगु ज्याय् नं राज्य पुनर्संरचना सम्बन्धी खँ, शासकीय स्वरुपया खँ अझ नं निर्णय याये फुगु मदुनि। थ्व बारे गय् यानाः निर्णय यायेगु धइगु प्रक्रिया तकं उमिसं क्वःछी मफुनि। थज्याःगु अवस्थाय् स्वलाया दुने संविधान दयेके फइ धकाः नं ग्यारेन्टी कायेगु थाय् मदुनि। दलतय्गु थःगु हे अडानं थ्व खँ क्वःछी मफुसा थुकियात मेगु छु विधिपाखें क्वःछीगु खः, उकियापाखे नं वनेगु ज्या जुइमाः। यदि अडान हे जक कयाच्वनेगु खःसा खुला मखु मेगु खुदं नं संविधान दयेके फइ मखु। आः थ्व अडानय् नं हिउपाः वयेमाःगु दु ।

More Stories Like this