इतिहासया कठघराय् कांग्रेस

संविधान सभाया म्याद थप जुइ लाकि मजुइ ? थपय् मजुल धाःसा नेपाली कांग्रेसयाहे कारणं संविधानसभा भंग जुइगु अवस्था वःगु दु । विदेशी जःलाखःला देय् भारतया पकडय् दुगु मधेसी मोर्चाया दलत छगू धुंकाः मेगु राष्ट्रघाती ज्वा यानाः मधेसयात भारतयाहे कृडास्थल दयेकेगु जमर्को यानाच्वंगु दु । हालै सरकारं वहुमतं संविधानसभाया म्याद थपय् यायेगु धकाःमानसिकता दयेकाच्वंगुयात भारतं करौडों ध्यबा नकाः फोरमयात तछ्यानाः वीवं असफल यानाव्यूगु दु । संविधानसभाया म्याद मन्त । चान्हय् सहमति जुल धाःसा म्याद थपय् जुइ । मखुसा कांग्रेसया कांरणं संविधानसभा भंग जुइगु प्राय निश्चित जुइ धुंकूसां सरकारके विकल्प धकाः दहे मदुगु धाःसा मखु । देशय् संकट काल लगय् यनाः म्होनिं खुलाया नितिं म्याद थप यायेगु अन्तिम लँपू सरकारयाके सुरक्षित दु ।

तर थन संविधान दयेके धकाः वःगु नेपाली कांग्रेसया सभासद्पिसं संविधानसभाया म्याद थपय् मयातहे धाःसा नेपाली जनतायात स्पष्टीकरण वीगु लाकि मवीगु ? माओवादीया ल्वाभः वा सरकार परिवर्तनया खँ नाप संविधानसभाया खँयात स्वाके मज्यू व जवरजस्ती स्वाकेत स्वल धाःसा नं नेपाली जनतायात उकिया स्पष्ट व उचित लिसः मव्युसे मगाः । माओवादीयात गलय् यायेत वा पेले यायेगु नियतं हःगु शर्तनामायात नेपाली जनतां स्वीकार याइगु अवस्था मदु । छाय् धाःसा संविधान सभा माओवादी झिदँया महान जनयुद्ध यानाः झिंप्यद्वलं मयाक देय्या होनहार मनूतय्सं हिया खुसिवाहाः न्ह्याकाः वःगु खः । संविधानसभा मार्फत नेपाली जनतायात वःगु अनेकौं उपलब्धितय्त न्हूगु संविधान दयेकाः पिकाये मफुत धाःसा व दक्को उपलब्धीत नं तनेत वेर मदु, गुगु खँ कांग्रेस नितिं छुं मखुसा नेपाली जनतां त्वःतेत तयार मदु । ३ करोड जनताया भविष्य व वर्तमान जीवननाप स्वनाच्वंगु संविधानसभायात नेपाली कांग्रेसयाहे कारणं थौं संकटय् दु, जीवन मरणया स्थितिइ दु । तर थुकियात अन्तहे यायेगु नियतं नेपाली कांग्रेसं उगु मागय् तसय् मस मजुसे संविधान सभा भंग यायेतहे स्वल धाःसा नेपाली कांग्रेसया थ्व दकले तःधंगु व वइगुनितिं दकले लिपाया महाभूल जुइफु । थ्व गल्ति कांग्रेस मयायेमाः । संविधानसभाया म्याद थपय् यायेगु कि मयायेगु धयागु न्ह्यसः धात्थेंला कांग्रेसं थःगु भविष्य ल्यंकेगु लाकि मदयेकाः हे छ्वयेगु ? वइगु छगू निर्णयलय् देतनाच्वंगु दु । इतिहासया कठघराय् नेपाली कांग्रेस दु ।

More Stories Like this