जनजातित खनाः बिस्युं वन शिव सेना
स्वराज महर्जन
संघीयता व धर्म निरपेक्षताया विरोध याइपिं लिपांगु इलय् वयाः येँय् केन्द्रीत जुयाः वयाच्वंगु दु । आदिवासी जनजातिय्सं जातीय पहिचान सहितया प्रदेशत निर्माण यानाः राज्यया पुनर्संरचना यायेमाः धकाः माग यानाः वयाच्वंगु इलय् हे अथे जातीय स्वायत्त प्रदेश विरोधीत सक्रिय जुयाः वयाच्वंगु खः । विशेष यानाः हिन्दुबादी व राजतन्त्रया नामं इपिं न्ह्याः वयाच्वंगु खः । तप्यंक हे राजतन्त्रयात लित हये मफैगु जुयाः संघीयताया अःखः एकात्मकतावादी अले धर्म निरपेक्षताया अःखः हिन्दु राज्यया माग यानाः अथे मनूत सक्रिय जुयाः वयाच्वंगु नाप नापं स्वनिगः -नेवाः प्रदेश)ं तकं बन्द यानाः नेवाःत नाप नापं आदिवासी जनजातिय्त हायेकेगु थें यानाच्वंगु दु ।
नेपाःया आदिवासी जनजातिय्सं नेपाःया अन्तरिम संविधानया अःखः हिन्दु राज्यया घोषणा यायेमाःगु माग यानाः वयाच्वंपिं शिव सेनाया कार्यकर्तातय्त लिनाछ्वयेगु नाप नापं इमिगु ध्वाँय् तकं लाकाकायेगु ज्या जूगु दु । वंगु शुक्रवाः येँया माइतिघर मण्डलाय् अथे शिव सेनाया कार्यकर्तातय्त लिनाः छ्वयेगु ज्या जूगु खः । बाबाजिया वसः पुनाः शिव सेनाया ध्वाँय् ज्वनाः वयाच्वंपिं तराई मूलया ख्वाः वःपिं थ्यंमथ्यं निगू दर्जनम्ह शिव सेनाया कार्यकर्तातय्त आदिवासी जनजातिया कार्यकर्तातय्सं लिना छ्वयेगु ज्या जूगु खः । इपिं बिस्युं वंगु खः ।
आदिवासी जनजाति व नेवाःत खनाः बिस्युं वंसां इपिं गुगु नं इलय् हाकनं हिन्दुया नामं, एकात्मकतावादी बाय् राजतन्त्रवादी अर्थात गणतन्त्रया विरुद्धय् छ्यःं ल्ह्वनाः वइगुु अवस्था दु । उकिं आदिवासी जनजातित झन सचेत जुयाः न्ह्याः वनेमाःगु आवश्यकता दु । शुक्रवाः संघीयता, नेवाः नापं जातीय स्वायत्त राज्यया विरोध यानाः अतिवादी हिन्दुतय्गु संगठन विश्व हिन्दु महासंघ नापं चुरे भावर राष्ट्रिय एकता पार्टीं बन्द आह्वान याःगु इलय् अथे इमिगु बन्द आह्वान धैगु जातीय प्रदेश नापं संघीयता विरोधी खः धकाः उगु बन्दया अबज्ञा यानाः येँय् मोटरसाइकल र्याली पिकायेगु झ्वलय् अथे घटना जूगु खः । येँया शान्ति वाटिका लागां न्हिनय् पिकाःगु नेवाः नापं आदिवासी जनजातिया कार्यकर्तातय्गु मोटरसाइकल र्याली येँया थाय् थासय् चाःहिला क्वचायेकूगु खः ।
