अन्ततः स्वलाया नितिं म्याद थप

स्वलाया दुने सेना समायोनया कार्यतालिका दयेका ज्या याइगु

येँ (झीगु स्वनिगः)

संविधानसभाया म्याद अन्ततः स्वलाया नितिं थप याःगु दु । न्हापांनिसें संविधानसभाया म्याद थप यायेगु जुइमखु धकाः अडान कयाः वयाच्वंगु नेपाली कांग्रेस नं संविधानसभाया म्याद थप यायेत अन्तिम इलय् तयार जूगु खः । एकीकृत नेकपा -माओवादी) व नेपाली कांग्रेसया शीर्ष नेतातय्गु दथुइ म्हिगः बहनी उगु कथं सहमति जूगु खःसा अनंलिपा संविधानसभां पारित यानाः संविधानसभाया म्याद स्वलाया नितिं थप याइगु जूगु दु । सहमतिइ लच्छिया दुने जनसेनाया ल्वाभः राज्ययात लःल्हायेगु अले स्वलाया दुने सेना समायोजनयात पूवंकेगु नापं मेगु स्वलाया दुने न्हूगु संविधान निर्माण यायेगु धकाः सहमति जूगु दु । बहनिसिया ११ ताःइलय् तक्कया दुने स्वंगू दलत सहमतिया स्थिति थ्यनेवं उखें माओवादीया नाप सहलह ब्याकूम्ह मधेशी मोर्चां धाःसा स्वंगू दलया दथ्वीया सहमतियात कयाः कुंख्यंगू दु व उकिंयात कडा शब्दं अस्विकार नं याःगु दु ।

सहमतिलिपाया ई तनेगु नितिं प्रक्रिया

संविधानसभाया म्याद तनेगु नितिं दलत दथुइ सहमति जूसां तविं अन्तरिम संविधान संशोधनया नितिं संसदया प्यंगू बैठक च्वनाः प्रक्रिया पुवंके माः । न्हापांगु बैठकय् विरोधया सुचं व विधेयक पेश यायेगु नितिं अनुमति फ्वनीगु । अथेहे, निक्वःगु बैठकय् विचाः यायेमाः धइगु प्रस्ताव पेश यानाः सैद्धान्तिक सहलह यानाः नियमावली संशोधन याना व संशोधन विइगु नितिं ७२ घौं विइगु प्रावधान चिइकीगु दु । अथेहे, स्वंगु बैठकं दफावार सहलह यानाः विधेयक दयेकेगु प्रस्ताव प्रस्तुत याइगु । संसद सचिवालय श्रोतया कथं विधेयक दयेकेगु नितिं मतदान जुइगु सचिवालयया छम्ह अधिकारीं जानकारी वियादिसें थौंतक मतदानं हे पारित जुयाच्वंगु नं धयादिल । अथेहे, उखुन्हु हे विधेयक राष्ट्रपतिं प्रमाणिकरण यानाः उकिंया सुचं न्यंकेगु नितिं प्यक्वःगु चरणया बैठक तइगु प्रावधान दु । ई मगात धाःसा संविधान संशोधन विधेयक प्रमाणिकरण जूगु व संसदया मेगु बैठक गबले च्वनी धकाः सुचं तिकाः जानकारी विइगु संसद सचिवालयया प्रवक्ता मुकुन्द शर्मां जानकारी वियादिल ।