बहुमत खाकेत अझं कुतः
चिचीधंगु पार्टीतय्त मन्त्री नकेगु प्रस्ताव
येँ (सन्ध्या टाइम्स) एमाले - कांग्रेस गठबन्धन सरकार दयेकेगु लािगं कुतः याना च्वनादीम्ह एमालेया वरिष्ठ नेता माधव नेपालं थःगु पक्षय् २९२ सभासद्तय् समर्थन दयेवं हे सरकार गठन थम्हं यायेगु धकाः दावी याइगु जूगु दु । सरकार गठनया लािगं माःगु ३०१ थम्हं सदनय् क्यनेगु बिचाः वय्कलं यानादीगु दु ।
उखे सरकार गठनया ताःचा- प्वाँय् ज्वनातःम्ह धयातःम्ह फोरमं अन्तिम तक नं थःपिनिगु हे नेतृत्वय् सरकार गठनया लािगं कुतः यायेगु व यदि मफुत धाःसा एमालेया सर-कारयात हे पिने च्वनाः समर्थन यायेगु रणनीति दयेकूगु दु ।
फोरमया नेतृत्वय् सरकार गठन यायेगु धाःसां आः सर्वमान्य नेता पिहां मवःगु एमालेया हे नेतृत्वय् वनेमाः धयाच्वंिपंसं अडान मत्वःतूगु आदि कारणं फोरमया सरकार वयेत नं अःपु मजूगु दावी सूत्रया दु । सरकार गठनय् समस्या वइगु जुइवं माओवादीं छगू छगू जक सीट दुपिं पार्टीतय्त नं लगातार नापलानाः मत वनेगु ज्या न्ह्याकाहःगु दु । यदि फोरमया नेतृत्वय् सरकार गठन जुल धाःसा उकियात माओवादीं समर्थन यायेगु रणनीति दयेकाच्वंगु दु ।
मेखे एमालेया नेता माधव नेपालया पक्षय् २९२ सभासद्तय्सं हस्ताक्षर यायेधुंकल धाःसां अझ नं बहुमत खाइगु सम्भावना धाःसा म्हो हे जक दनिगु खँ धाःगु दु । फोरम मवःसां बहुमत खाइ धकाः एमाले नेतातय्सं पिने धायेगु यानाच्वंसां पार्टी अध्यक्ष झलनाथ खनालं धाःसा फोरम मवयेकं बहुमत खाइगु सम्भावना मंत उिकं फोरमं ग्वाहालि यायेमाल धकाः म्हिगः बहनी तिनि फोरमयात इनाप यानादीगु खँ सह अध्यक्ष जेपी गुप्तां जानकारी बियादीगु दु ।
फोरमं एमालेयात थःपिनिगु ८ बुँदे मागय् एमाले सहमत दु धइगु लिखित प्रतिवद्धता वःसा जक साथ बीगु घोषणा यायेधुंकूगु दु ।
उखे सरकार गठनय् निखेरं भोट मबीगु बिचाः यानाच्वंगु चिचीधंगु पार्टीतय्त नं नेपाली कांग्रेसं नापलानाः एमालेयात भोट बीत इनाप यानाच्वंगु दु । थ्व झ्वलय् थौं नेकां सभापति गिरिजाप्रसाद कोइरालां नेमकिपा नायः नारायणमान बिजुक्छे नापलानाः थ्व इनाप याःगु खःसा उगु इलय् बिजुक्छें थःपिनिगु १८ बुँदे माग पूवंकेगु खःसा सरकारयात समर्थन याये धयादीगु खँ सीदुगु दु । लिसें कांग्रेसं मेमेगु नं चिचीधंगु दलतय्त नापलानाः खँल्हाबल्हा न्ह्याकाच्वंगु दु । निगुलिं गठबन्धन-पाखें चिचीधंगु पार्टीतय्त नं पूर्ण मन्त्री दयेकेगु आश्वासन बियाः थःपाखे सालेगु ज्या यानाच्वंगु खँ सूत्रं धाःगु दु ।
