स्वःगु नुगः [बाखं]

बिमला शाक्य

लतंमाया डाक्टरयागु सल्लाहकथं न्हिंन्हिं सुथय् गःचाः ह्यूवनी । लँखतं लाःपिं द्यःपिन्त कीगः तिनाः अन्याइ । थौं गुँपुन्हि, भुइख्यलय् दोकय् तयाः मियाच्वंगु वाउँचा तरकारीइ वयागु मिखा वनी । डाक्टरं वया भाःतयात वाउँचा तरकारी नकि’ धाःगु लुमनी । स्वये हे साइख्वाः वः।

तरकारी मू याना च्वंह्येसिया हितिइ लः मवःगु लुमना वल । नाःति बाः वयाच्वंगु खुसिइ वाउँचा सिलाच्वंगु लुमनी । प्यन्हुइ छकः लः वइ । व नं बाघौ । वाउँचा पुत्तु पुइकाच्वंह्य लतंमायायात वया पासा दिलहेरां नँतुइ ।

'छु सिन्का पाय्पुगु वाउँचा पुइका च्वनागु । तापाःख्वाः । आः ला छंगु ख्वाः स्वये हे आपुलुगु ?’लतंमाया अजूचाः पहलं लिसः बी - 'तापाःख्वाः छ लाकि जि ? थःगु कुल छेँ त्वःताः तापाक च्वंवन । बरु छ नं थन गःचाः ह्यूवया ला ? जिथाय् वयेत लिमलाः । मेथाय् न्ह्याथासं थ्यं ।’

'थन वनागु दु धकाः अथे धायेत ? थौं गुँपुन्हि जुयाः जक । छेँनं पिहांवयेत थाकुगु खँ न्यनाच्वंह्य लतंमायां तीजक थानास्वत ।’ "छेँय् सकलें ह्यंफु ला ? छंगु मिखा निपां ह्याउँसे, मिखाय् पिचः झ् ख्वाः नं फ्वः फ्वः धाः, मफुलाकि छु ?"

"फु धाये ला मफु धाये ला । बाचा इलंनिसें हितिइ लः फयेत पियाच्वना । लः वइगु ई ब्यः मदु । लः वःबलय् द्यः तुइ
धुंकल । लः वलं नसलाः कायेत नं मगाः । अनं लिपा हानं द्यनेगु ला दनेगु ला । छेँ ज्या नि यायेगु कि ।" दिलहेरां छगू हे सासलं न्ह्यत कुन्हु चान्हय् द्यने मखंगु खँ कन ।

छं काय् म्ह्याय्पिं ला नापं दु ? दिलहेरां ताःहाकः सासः ल्हात - "निह्यं पिने । ब्वनिगु क्वमचाःनि हँ ! उपिं निह्यय् छह्य थन दुगुसा बौह्येसित भचासां बिचाः याइ । जि याकः वयात निं स्वये ला ! छेँय् ज्या निं याये ला ! दमया ल्वगि । थ्व अय्सां पिहाँ छकः वयेत नं मू लुखाय् तालं ग्वयाः वयेमाः । न्हिनय् हे मनू पालीगु । खुया यंकीगु । खुँ, लुच्चातय्गु देय् थ्व । झी थें ज्याःपिं तसकं म्वाये थाकुल । सरकार स्वःसा बुँख्याःचा ।

"छ जि हालां छु याये । झी थुजाःपिनि खँ सुनां न्यनी ? हालेमाःपिं ह्युतुइ भ्वाथः स्वथना च्वन । मचातय्त लिहां वयेकेत पाः फयेकाः छ्वया । थनयागु पहःचहः खनीबलय् लिहांमवःसां ज्यू थें ताइ । आः ला वा नं धायेमखु । अन हे च्वंसां थच्वँ । स्वःस्वःथाय् बौ वानातःथें फोहर सीकाः पापित नर्कय् लाइ धाइ । झी ला म्वाःम्वाकं हे नर्कय् च्वनेमाला च्वन । फोहर लँय् द्वँ चिनातःगु छवाः नं मयाये धुंकल । लतंमायां वयागु खँ त्वाः ल्हानाः थःगु खँ द्यतन "थन छु भिं खँ न्यनेमदु । बांलाःगु छुं स्वयेगु मदु । थनया नेता धाःपिं थः छह्य कति लायेवं गाः । थः छह्यय्सिगु जक च्यूताः ।" दिलहेरां वयागु खँ पूमवंक थःगु खँ लिसकाल - "च्वना देय् सुख, न्यना देय् दुःख" धापू आः ठिक अःखः जुल ।

"न्यना देय् सुख, च्वना देय् दुःख" थनयागु खँ ल्हानां मब्याः । बरु सकलें जानाः उमित गःतां ज्वनाः फ्वा याये फयेमाः । का छेँय् हालाच्वनी । दिलहेरा वयाके बिदा फ्वनाः वनाछ्वत । लतंमाया वाउँचा ल्हातय् ज्वनाच्वंगु खन । वया मनय् खुसि बाः वःथें लँ लुयावल । वयानं म्ह्याय् पिने । म्ह्याय्यात अमेरीकाय् लजगाः दुह्यं ल्हाकेहःगु लुमनी । दतंफतं छह्य म्ह्याय् । तापाक्क बी मखु धकाः खँ मफः ।दिलहिरां धाःगु मखुगु मखु । थःत बिचाः याकेया निंतिं वयागु भविष्य स्यंके मज्यू ।थनयागु अवस्था लुमनी । व हीमिं चाइ ।"सुयात पाः यायेगु ग्व ? थन न्हियान्हिं मनूतय् ल्याः थाहाँवना च्वन ।स्वनिगलय् दुने जक न्ययेगू लख मनूत दु हँ ! सुनां पनीगु ? थनया सरकार दम मबीकं छुं यायेमफुह्य । धिक्कार थ्व नं सरकार ला ?"

न्हापा थ्व हे स्वनिगः स्वर्ग थें, याकःचा मिसा बाचा इलय् पिहाँजूसां ग्यायेम्वाः । बुँ छ्येँनं जाल । न्यासि वनेत लँ नापं मगाये धुंकल । थन च्वंपिंनं ल्वः । धेबा अप्वः वल धायेवं छेँ-बुँ मी ज्यू ला ? धेबां फू, थाय् नं फू । आः ला थ्व देय् लाखेय् लसिंतय्गु जुइ धुंकल । उमिगु धंवा मथ्वयेकं मनूतय्सं याउँक सासः ल्हाये खनी मखुत ।"भुनुभुनु हाहां लतंमाया मूलुखाया ताः चायेकाः दुहांवन ।

साभार : बाखं दबू ल्याः ४।

More Stories Like this