स्वनिगलय् स्वंगः गाडी च्याकल
येँ (सन्ध्या टाइम्स)/थौं घोषणा यानातःगु बन्दया अबज्ञा यात धासें थौं सुथय् स्वनिगःया स्वंगू थासय् स्वंगः गाडी च्याका बिउगु दुसा छगः गाडी तोडफोड याना बिउगु दु। सर्वसाधारण मनूत च्वनीगु सार्वजनिक रुटया गाडींनिसें प्रेसया गाडी तकं च्याका बिउगु खः। चुरेभावर राष्ट्रिय एकता पार्टी नेपाल, विश्व हिन्दु महासंघ व नागरिक समाजपाखें थौं बन्द आह्वान याःगु खः। ब्यागलं ब्यागलं पार्टी व पुचःपाखें बिस्कं बिस्कं कथं हे थौं बन्द आह्वान याःगु खः। बन्दकारीतय्सं थौं कान्तिपुर टेलिभिजनया बा. ५ च ९३७५ नम्बरया गाडी बनस्थलिइ, नेपाल यातायातया बा. १ ख ७३२४ नम्बरया गाडी जडीबूटीइ व डिल्ली बजारय् बा. १ ज ६२५५ नम्बरया माइक्रोबस च्याका बिउगु खः ।
अथे हे बसुन्धारा लागाय् छगः ट्याक्सी तोडफोड याना बिउगु दु। अन गाडी च्याका बिउगु नापं तोडफोड याःगु आशंकाय् प्रहरीं निम्हेसित ज्वंगु दु। थौं बन्द आह्वान याःगु दल व पुचः मूल रुपं संविधानसभा विघटन यानाः न्हूगु जनादेशया नितिं चुनावय् वने माःगु व जातीय पहिचानया आधारय् न्हूगु राज्यया पुनर्संरचना याये मजिउ धासें संघीयता व धर्म निरपेक्षताया विरोधीत खः ।
