ख्यालिम्येया लसय् व खँग्वलय् न्ह्याबलें म्वानाच्वनी नगेन्द्र हाडा

विराजकाजी राजोपाध्याय

२०६७ ज्येष्ठ कृष्ण दशमि। नेपाःया कलाकारीता ख्यःया नितिं छगू दुःखद् दिन। थ्व व हे दिन खः, गुकुन्हु निर्दयी कालं झी सकसियां यःम्ह कलाकार नगेन्द्र हाडायात झीलिसें तापाका यंकल। थ्व हे दिनकुन्हु कलाकार भाजु नगेन्द्र हाडाया नश्वर शरीरं देहत्याग यात। थौं वय्कः मदुगु दछि फुत। थौं झीसं लुमंकाच्वनागु दु कलाकार भाजु नगेन्द्र हाडायात। थौं झीसं लुमंकाच्वनागु दु संगीत ख्यःया नितिं नगेन्द्र हाडाया योगदानयात ।

नेवाः संगीत ख्यःयात यक्व हे न्ह्यइपुगु म्ये बियादीम्ह भाजु नगेन्द्र हाडाया जीवन स्वयेगु खःसा यक्व हे दुखं जाः। वय्कःया जन्म विक्रम संवत् १९९८ स अबु दैवज्ञरत्न हाडा व मां बिष्णुदेवीया कोखं ख्वपया इच्छुत्वालय् जूगु खः। मचांनिसें हे क्वाछेँया भगवती देगलय् भजन हाः वँवं हे चायेकं मचायेकं हे वय्कलं संगीत ख्यलय् थःगु यात्रा न्ह्याकादिल। मांया कोखं हे छम्ह कलाकारया रुपय् जन्म कयादीगु खः वय्कलं। मचांनिसें हे चित्रकला व संगीतय् तसकं मन क्वसाः वय्कःया। चित्रकला व संगीतय् अतिकं रुचि दुगु खःसां उगु इलय् थजाःगु कलायात समाजं उलि बांलाःगु मिखां मस्वइगु गुलिं मययेक मययेकं हे चित्रकलापाखें वय्कलं थःगु ल्हाः चीकादिल। तर संगीत धाःसा त्वःते मफुत ।

सुख छु खः दुख छु खः धइगु हे बांलाक थूगु ई मखुनि। वि.सं. २००४ सालय् वय्कः खुदँ जक दुगु इलय् मां मदुसेलिं मांया ममतापाखें बञ्चित जुइमाल। वयां लिपा वय्कः येँया मरुइ थः पाजुपिंथाय् च्वंझाल। पाजुपिंथासं हे बाल्यकाल बित। झिंच्यादँय् पलाः छीवं वि.सं. २०१६ सालय् वय्कलं रेडियो नेपालपाखें भ्वाइस टेस्ट पास यानादिल। वय्कःया सांगीतिक यात्रां गति काल। उगु इलय् वय्कलं यक्व हे नेपाली म्ये हालादीगु दु। उगु इलय् प्रसाद श्रेष्ठलिसे जानाः वय्कलं यक्व हे नेपाली म्ये हालादिल। वय्कःपिं निम्हेसिगु पुचः प्रसाद हाडा धकाः अतिकं लोकं नं व्हात। प्रसाद हाडा पुचःया देउराली डाँडा नकाटेसम्म उगु ईया अतिकं लोकंव्हाःगु म्ये खः ।

नगेन्द्र हाडां यक्व हे म्ये हालादिल जक मखु, यक्व हे म्येय् लय् तयादिल, च्वयादिल। नेपाःया संगीत ख्यलय् वय्कलं बियादीगु योगदानयात झीसं गबलें नं ल्वःमंके मजिउ। अझ बिशेष यानाः नेवाः संगीत ख्यःया दुने ख्याली म्येया बिधाय् वय्कःया योगदान तसकं च्वछायेबहजू। भाजु मदनकृष्ण श्रेष्ठं हालादीगु ख्यालीम्ये मध्ये अप्वः थें म्ये भाजु हाडाया हे श्रृजना खः। मदनकृष्ण श्रेष्ठं हालादीगु छःपिं जक काली मखु, मरु गणेद्यःया देगलय् गजू मरु, नारानद्यःथाय् भ्वय् नयां, सापारु कुन्हु येँ यल ख्वप देशय्, पपू चानाबिलकि, ला छकू वय्कः समयबजि, असनय् खः ल्वाकूबलय्, हे दक्षिणकाली, यःमरी चाकु थें थुगु दक्वं म्येया सर्जक भाजु नगेन्द्र हाडा खः। मदनकृष्ण श्रेष्ठयात भाजु नगेन्द्र हाडां दकलय् न्हापां विक्रम संवत् २०२७ सालय् म्ये हायेकादीगु खः। २०२७ सालय् मुनासःया ज्याघ्वलय् भाजु हाडां मदनकृष्ण श्रेष्ठयात मरु गणेद्यःया देगलय् गजू मरु म्ये हायेकादीगु खः। थुगु म्ये गुलि लोकं व्हात धइगु खँ सुयातं कनाच्वने माः थें मच्वं। थ्वयां लिपा भाजु हाडां मदनकृष्णयात यक्व हे म्ये हायेकादिल। वय्कःपिनिगु पुचःया दक्व हे धइथें म्ये अतिकं अतिकं लोकं व्हात। वय्कःया अप्वः धइथें लोकंव्हाःगु श्रृजनायात झीसं मदनकृष्णया सलं हे म्हसिउ। तर नगेन्द्र हाडाया श्रृजना मेमेपिं गायकपिंसं नं हाःगु दु धकाः धाःसा उलि मसिउ धाःसां जिउ। मेमेपिं गायकपिंस नं भाजु हाडाया म्ये हालादीगु दु, गुगु म्ये थौं तक नं लोकंव्हानाच्वंगु हे दु। उकी मध्ये छपु म्ये रमेश ताम्राकारं हालादीगु लाय्कुलिइ दरवार दु नं खः ।

वय्कःया इहिपा २०२० सालय् जूगु खः। वय्कलं ख्वपया जानकी राजोपाध्यायलिसे प्रेम-विवाह यानादीगु खः। इहिपाया च्यादँया दुने निम्हेसिया मतिनाया स्वांया रुपय् निम्ह कायपिनि जन्म नं जुल। २०२१ सालय् काय रबि व २०२८ सालय् काय् राजेशया जन्म जुल। थौंकन्हय् रबि व राजेश नं अबुया पलाःचिं लिनाः संगीत ख्यलय् न्ह्याःवयाच्वंगु दु ।

तःदँ थः पाजुपिंथाय् च्वने धुंकाः थःगु परीवारलिसे भाजु हाडा थःगु जन्मभूमि ख्वपय् हे लिहाँझाल। परिवारया जिम्मेवारी व जागीरपाखेया व्यस्ततां छुं ई वय्कः संगीत ख्यःपाखें तापात। थुकथं दुखसुख यायां जीवन न्ह्यानाच्वंगु खः। तर लिपा वयाः वय्कःयात थःगु उसाँय्नं हे दुख बियाहल। वि.सं. २०४४ सालय् वय्कःयात डाइबिटिज ल्वचं कल। व हे ल्वचं यानाः २०५८ सालय् वय्कःयात पक्षाघात नं जुल। लछितक ला वय्कः पक्षाघातया कारणं लासाय् हे लात। लछि लिपा पक्षाघात ल्वय् ला क्वलानाः वन। वय्कः बुलुहुँ बुलुहुँ न्यासि जुइ फत, खँ ल्हाये नं फत। उगु इलय् वय्कलं म्ये हालेगु कुतः यानादिल, तर अहँ वय्कलं म्ये हाले धाःसा मफु। म्ये हालेगु, थःगु सांगीतिक यात्रायात न्ह्यःने यंकेगु मन ला दुगु खः वय्कःया। तर थःगु उसाँय्या अवस्थां यानाः वय्कलं थःगु सांगीतिक यात्रा न्ह्यःने यंके मफुत। डाइबिटिज ल्वचं ला दुख बियाच्वंगु हे जुल। लिपा वनाः डाइबिटिजं जलास्येँय् थिल। वय्कःया जलास्यें ज्या यायेगु त्वःतल। वालय् स्वकः तक डाइलासिस याये मालावन। थुकथं हे ल्वय्लिसे ल्वाल्वां वि.सं. २०६७ ज्येष्ठ कृष्ण दशमी कुन्हु वय्कलं देहत्याग यानादिल ।

जन्म छगू चाकुगु सत्य, अले थ्व हे चाकुगु सत्यलिसें मेगु खायूगु सत्य छगू नं नापं हे घानाच्वंगु दइ, मृत्यु। जन्म, मृत्यु, सुख, दुःख, न्हिला अले ख्वबि। थ्व हे ला खः झीगु जीवन। सुयागुं जन्म जुइवं सकल थःथितिपिं लय्ताइ। अले मृत्युलिसें सकलसिगु नुगः ख्वइ। जन्मं लसता हइ सा मृत्युं दुःख। तर छु याये, थ्व दुख ला छन्हु कि छन्हु सकसिगु जीवनय् व हे वइ। तर गुम्हं गुम्हं मनूया शरीर सिनावंसा झीगु नुगलय् धाःसा न्ह्याबलें म्वानाच्वंगु हे दइ। खः, नगेन्द्र हाडा झीगु नुगलं गबलें न तनावनी मखु। बस्, वय्कःया शरीर जक झी दथुइ मंत। तर मदनकृष्णया सलय् न्ह्याब्लें नगेन्द्र हाडा म्वाना हे च्वनी। नेपालभाषाया संगीत ख्यलय् लोकंव्हाःगु ख्यालीम्येया लसय्, खँग्वलय् नगेन्द्र हाडा न्ह्याब्लें ल्यनाच्वनी ।

More Stories Like this