हानं छक्वः अन्तिम घडीइ हे निर्णय?

अन्ततः नेपाःया राजनीतिक पार्टीतय्सं हानं छक्वः शुरुइ हे यायेमाःगु महत्वपूर्ण ज्या अन्तिम घडीइ वयाः सम्पन्न यायेगु पुलांगु हे परम्परा लिसा कायेत्यंगु दु। संविधान च्वयेगु ज्या सिमधःगु कारणं कन्हय् जेठ १४ गते संविधानसभाया म्याद थपे मयासें मगाः। तर थौं तक उकिया लागिं वातावरण तयार जूगु मदुनि। उकिं थगुने थें थुगुसी नं चान्हसिया १२ बजे हे जक अनेक कथंया सम्झौता यानाः म्याद थपे यायेगु ज्या सम्पन्न जुइगु अनुमान यक्वस्यां यानाच्वंगु दु ।

संविधानसभाया म्याद थपे यायेगु खःसा थःपिनिगु थुलि सर्त पूरा यायेमाः धकाः नेपाली कांग्रेसं झिगू बुँदा न्ह्यःने हःगु दु। उकी न्हापांगु बुँदाय् प्रधानमन्त्रीं राजीनामा बीमाःगु खँ दुथ्याः। तर प्रधानमन्त्रीं राजीनामा वयां लिपा गज्याःगु सरकार गठन यायेगु धइगु खँ उकी उल्लेख मदु। थुकिं यानाः यदि प्रधानमन्त्रीं राजीनामा बियाः संविधानसभाया म्याद थपे हे जुल धाःसां नं उगु थपे जूगु ई हानं न्हापा थें हे प्रधानमन्त्री जुइम्ह सु धइगु विवाद यायां हे फुना बी। उकिं कांग्रेसं न्ह्यःने हःगु राजीनामाया माग परिपक्व मजू। उकिया लिसें छुं जुयाः संविधानसभाया म्याद थपे मजुल धाःसा देशय् छु जुइ धइगु खँय् नं कांग्रेस स्पष्ट मजू। यदि म्याद थपे मजुसे देय् दुर्घटनापाखे वन धाःसा उकिया जिम्मा सुनां काइगु?

थज्याःगु अनेक अस्पष्टतां यानाः म्याद थपे यायेगु हे छगू
जक मू लँपु जुइगु व उकिया लागिं कांग्रेसं हानं छक्वः 'उधारो' हे सम्झौता यायेमालीगु यक्व सम्भावना खनेदु। तर गज्याःगु सम्झौता जुइ, थ्व धाःसा कन्हय् अन्तिम घडीइ मथ्यंकं धाये फइगु अवस्था मदु ।

More Stories Like this