कांग्रेसया शर्तय् विदेशी गन्ध

२००७ सालय् नेपाली कांग्रेसया नेता विश्वेश्वर कोइरालां संविधानसभाया खँ न्ह्यःने हयाः वा त्रिभुवनं संविधान सभाया चुनाव याके धकाः नेपाली जनताया न्ह्यःने पाफयांनं अन्तय् कांग्रेसयाहे कारणं संविधानसभाया चुनाव मयाकल । थुकिया करीव न्यागू दशक लिपा जूगु संविधानसभाया चुनावय् कांग्रेस व एमालेया एक्को नेतात बांमलाक्क बुइवं थुमित संविधान सभा पचय् मजुल व संविधानसभाया आयू मदयेधुंकूगु घोषणा यानाच्वंगु दु ।
संविधान सभां ज्या मयाःगु वा यायेहे मफूगु थ्यंक मखु । छुं छुं विषयगत खँत त्वःताः ९० प्रतिशतं मयाकं ज्या क्वचायेके धुंकूगु दु । आः छु प्रतिशत जक ज्या ल्यंदनि व छुं ला संविधान सभाया म्याद थपय् यातधाःसा न्हूगु संविधान आः पिहांवइगु अवस्थाय् दु ।

आःया संविधानं विगतया १० दँया महान जनयुद्धयात सम्वोधन मयाःःसां जनताया पक्षया जनसंविधान पिहांहे वयेत्यंगु दु । तर नेपाली कांग्रेस, मधेसी दल लगायत संसदवादी व अवसरवादी १७ दलयात वहःकयाः कांग्रेसं १० गू शर्तत न्ह्यःने हःगु दु । थुकी अप्व शर्तत पुलांगु हे खःसां सभाय् सापेक्ष धाःसा धायेफैमखु । १४ गते तक्कया दुने हतियार सरकारयात लःल्हायेगु, ७ गू वुंदे सहमति खारेज यायेगु व प्रधानमन्त्री झलनाथ खनालयात राजिनामा वीकेगु लगायत माग तयाः संविधानसभा थःपि निगु माग मजुसे मानो माओवादी याक चिगु माग खः धायेत स्वयाच्वंगु दु । यथार्थय् थ्व मागः सुयागु खः ?

स्वयेवलय् नेपाली कांग्रेसया माग थें च्वंसां वास्तविकता मेगुहे दु । संविधानसभाया म्याद नाप एकीकृत नेकपा -माओवादी) यात कमजोर यायेगु वइगु ल्हातय् दुगु ल्वाभः लाका कायेगु व थुया लिपा संविधानसभा भंग यानाः २०४७ सालया संविधानहे न्ह्यःने हयेगु भारतया चाहना खः । थ्वहे चाहना पूवंकेत नेपाली कांग्रेस, माधव नेपाल केपी ओली निसें मधेसवादी स्वंगू दल नाप सकृयरुपं लगय् जुयाच्वंगु दु । तर कांग्रेसं छुंहे खँ मस्यू धाःसा संविधान पिहां मवःतले वा संविधान पिहां वइगु खँया ग्यारेन्ति मजू तले माओवादीं न ल्वाभः त्वःती, न सेना समायोजन जुइ ! संविधान व सेना समायोजन छगू मेनुया पूरक जूगुलिं छगूया जक वकालत यानाः मेगु यात ध्याक्वय् छ्वयेगु भारतया चाहना पूवंनीमखु । थ्व खँय् स्पष्ट जुइहेमाः ।

More Stories Like this