जनजातिपाखें संविधानसभा घेराउ
येँ (झीगु स्वनिगः)
म्हिगः जेठ १२ आदिबासी जनजातिं मैत्री संविधान दयेकेमाःगु धइगु माग तसें संविधानसभाया भवन घेराउ याःगु दु । स्वनिगःया झिनिगू थाय् येँया लुँहिति, त्रिपुरेश्वर, माइतिघर, पुलांगु बानेश्वर, चाबहि, अनामनगर, भृकुटीमण्डप, तीनकुने लैनचौर, यलया मंगः व ख्वपःया कोटेश्वरं मुना वःगु थीथी जातीय संघ संस्थातय्गु जुलुसं संविधान सभाया घेराउ याःगु खः । स्वनिगःया झिंनिगू थासं पिहां वःगु जुलुस न्यंकं १२ ताः इलय् पिहां वःगु खः । जुलुसय् नेवाःत, तामाङ, मगः, सेर्पा, पहाडी, छन्त्याल, थकाली, दुरा, बराम, माझी, राई, लिम्बु, याक्खा, सुनार, शेर्पा, गुरुङ, आदिवासी जनजाति महिला महासंघ, आदिवासी जनजाति विद्यार्थी महासंघ, आदिवासी जनजाति युवा महासंघ आदि संघ-संस्थात पाखें ब्वति काःगु खः ।
उगु जुलुस संविधानसभा भवन न्ह्योने वनाः धर्ना ह्यूगु खः । धर्नाय् सम्बोधन यासें सकल जनजाति नेतातय्सं जातीय पहिचान सहितया प्रदेशतय्गु सुनिश्चितता सहितया संविधान च्वयेगु नितिं दबाब ब्यूगु खः ।
ज्याझ्वलय् नेतातय्सं जनजाति धाइपिं न्हापां निसें देशय् दुश्मनं आक्रमण याइ धकाः सुरक्षानितिं संघर्ष याना च्वंगु व न्ह्याबलें विदेशी दुश्मनत नापं ल्वानाः च्वंगु यदि आः थःपिनिगु अधिकार सुनिश्चित यायेगु पल्सा षड्यन्त्र गनंनं यात धाःसा उकिया विरुद्ध ल्वाय्त तयार जूगु धकाः ख्याच्वः नं ब्यूगु दु ।
