१० दल म्याद थपया पक्षय्
येँ (झीगु स्वनिगः)
संविधानसभाय् दुगु चीधंगु झिगू दल संविधानसभाया ई तनेगु पक्षय् खनेदुगु दु । म्हिगः सुथय् च्वंगु झिगू दलया बैठकं शान्ति व संविधान निर्माणया ठोस कार्यतालिकालिसे चीहाकःगु ईया नितिं म्याद थप यायेफइगु निर्णय याःगु खः । बैठकय् ब्वति दुम्ह चुरेभावर राष्ट्रिय एकता पार्टीया नायः केशव मैनालीं शान्ति प्रक्रिया व संविधान लेखनया विषयलय् निश्चित ई क्वःछीत सरकार प्रतिबद्ध जूसा थःपिं सरकारी प्रस्तावया पक्षय् दनेगु धयादिल ।
वय्कलं एकीकृत माओवादी जनसेनाया ल्वाभः राज्ययात लःल्हायेमाःगु धइगु शर्त थःपिंसं मतयाःगु नापं स्पष्ट यानादिल । बैठकय् नेकपा संयुक्त, राष्ट्रिय जनशक्ति पार्टी, नेकपा माले, राष्ट्रिय जनमोर्चा, नेपाल परिवार दल, चुरेभावर राष्ट्रिय एकता पार्टी, राप्रपा नापं मेमेगु दलया नेतातय्सं ब्वति कयादीगु खः । थ्व हे दथुइ मधेसी दलतय्सं नं संविधानसभाया म्याद थप यायेमजिउ धकाः धयाच्वंगु इलय् तराई मधेस लोकतान्त्रिक पार्टी नेपालं नं संविधानसभाया म्याद थप यायेमाः धकाः धयाहःगु दु ।
