सहमतिया नितिं स्वंगू दलया कुतः

१४ गते न्ह्यः हे सहमति यायेत अन्तर्राष्ट्रिय समुदायया इनाप

येँ (झीगु स्वनिगः)

वर्तमान राजनीतिक गतिरोध अन्त्य यानाः संविधानसभाया म्याद थप यायेगु नितिं नेपाःया अन्तरिम संविधानयात संशोधन यायेगु नितिं संविधानसभाया मूमू स्वंगू दलया शीर्ष नेतातय्सं तसकं कुतः यानाच्वंगु दु ।
कन्हय् शनिवाः १४ गते तक जक संविधानसभाया म्याद दनिगु अले न्हूगु संविधान कन्हय् तकया दुने जारी याये मफैगु अवस्था जुयाः संविधानसभाया म्याद थप यानाः वनेगु नितिं राजनीतिक सहमति ब्वलंकेत तिब्र रुपं नेतातय्सं कुतः यानाच्वंगु दु । स्वंगू दलया शिर्ष नेतातय्गु दथुइ थौं शुक्रवाः नं सहमतिया नितिं मुँज्या च्वनीगु जूगु दु ।

म्हिगः विहिवाः नं राजनीतिक सहमतिया नितिं स्वंगू दलया शीर्ष नेतातय्गु मंकाः मुँज्या प्रंधानमन्त्री निवास वालुवाटारय् च्वंगु खः । उगु मुँज्याय् गम्भीर रुपं सहलह जूगु खः धकाः धाःगु दु । मुँज्यालिपा एकीकृत नेकपा -माओवादी)या न्वकु मोहन बैद्य किरणं संचारकर्मीतलिसे खँल्हासें धयादिल 'जिपिं हाकनं थौं -शुक्रवाः) मुँज्या च्वनाः सहलह ब्याकेगु जुइ सहमतिया नितिं ।' वय्कलं सहमतिइ वनेमाः धैगु खँय् सकलसिगु राय दु धकाः नं धयादिल । शान्ति प्रक्रिया व संविधानसभाया म्याद थप नापं मेमेगु विषयसं म्हिगः जूगु उगु मुँज्याय् एकीकृत माओवादीपाखें पार्टीया नायः पुष्पकमल दाहाल प्रचण्ड, न्वकुपिं मोहन बैद्य किरण व डा. बाबुराम भटट्राई, एमालेपाखें प्रधानमन्त्री नापं पार्टीया नायः झलनाथ खनाल, महासचिव ईश्वर पोखरेल व भीम रावल अथेहे, नेपाली कांग्रेसपाखें पार्टीया सभपति सुशील कोइराला, महामन्त्री कृष्णप्रसाद सिटौला, रामशरण महत व मिनेन्द्र रिजालं ब्वति कयादीगु खः । अथेहे, म्हिगः राष्ट्रपति डा. रामवरण यादवं स्वंगू हे दलया शीर्ष नेतातय्त छक्वलं नापलानाः जेठ १४ गतेया दुने हे राजनीतिक सहमति मालेत इनाप यानादीगु खः । राष्ट्रपति यादवं माओवादीया नायः प्रचण्ड, प्रधानमन्त्री नापं एमालेया नायः झलनाथ खनाल व नेपाली कांग्रेसया सभापति सुशील कोइरालायात मंकाः कथं नापलानाः अथे इनाप यानादीगु खः ।

थ्व हे दथुइ युरोपेली युनियन नापं अन्तर्राष्ट्रिय समुदायपाखें विवादित विषययात याकनं हे सहमति यायेत दलतय्त इनाप यानादीगु दु । युरोपेली युनियनया दुजः राष्ट्रत डेनमार्क, फिनल्याण्ड, प|mान्स, जर्मनी, बेलायत, नर्वे, स्वीजरल्याण्ड, अष्टे्रलिया, जापान व अमेरिकाया राजदुदं म्हिगः विहिवाः मंकाः कथं विज्ञप्ति पिथनाः दलतय्गु दथुइ न्ह्यानाच्वंगु वार्तायात थःपिन्सं स्वया च्वनागु धासें लचकता क्यनाः सहमति यायेत तकं इनाप याःगु दु । मंकाः विज्ञप्तिइ धयातःगु दु 'शान्ति प्रक्रियायात निष्कर्षय् थ्यंकेत, प्रजातान्त्रिक नापं समावेशी न्हूगु संविधान च्वयेत व संविधानसभाया म्याद थपया नितिं सहमति ब्वलंकेत दलतय्गु दथुइ छुं वाःनिसें जुयाच्वंगु सघन सहलहयात जिमिसं बिचाः यानाच्वनागु दु । संविधानसभाया म्याद फुइत आः छुं घण्टा जक ल्यंदनिगु अवस्थाय् राजनीतिक दलतय्सं लचकता क्यनाः सहमतिया माध्यमं समाधान यायेत इनाप यानाच्वन ।