सर्वोच्चया फैसलां मेगु मोड
संविधानसभाया म्याद थपे यायेत मेगु समस्या
येँ (सन्ध्या टाइम्स)/संविधानसभाया म्याद दछि थपे यायेगु धकाः तयारी जुयाच्वंगु इलय् लाक्क वयाः सर्वोच्च अदालतं 'संकटकाल लागू जूगु अवस्थाय् संविधानसभाया म्याद खुला थपे यायेगु बाहेक मेबलय् थपे याये मजिउ' धकाः न्यंकूगु फैसलां सरकारयात झन् हे तःधंगु संकटय् लाका बिउगु दु ।
सर्वोच्चं याःगु फैसलायात पालना यायेगु सरकारया दायित्व जुइ, उकिं आः सर्वोच्चया फैसलायात गय् यानाः कार्यान्वयन यायेगु धकाः नं सरकारं सहलह ब्याकूगु खँ सीदुगु दु ।
थगुने थपे याःगु दछिया म्याद अवैध खःसां उगु अवधि दुने याःगु ज्या धाःसा वैध जुइ धइगु सर्वोच्चया थ्व फैसलायात गुलिसिनं धाःसा अस्पष्ट फैसला धाःगु दु। सर्वोच्चया फैसला थथे अस्पष्ट जूगु कारणं आः सरकारं थ्वहे अस्पष्टताया फाइदा (बेनेफिट अफ डाउड) कयाः संविधानसभाया म्याद हानं छक्वः थपे यायेगु ज्या यायेफु धकाः नं धाःगु दु। तर थुकिया लागिं नं राष्ट्रिय सहमति आवश्यक जुइगु कारणं यानाः दलतय् सहमतिं हे जक निकास पिकाये फइगु खँ धाःगु दु। छुं जुयाः म्याद थपे यायेगु निर्णय जुल हे धाःसां नं आः अन्तरिम संविधानयात मेकथं व्याख्या यायेमालीगु जूगुलिं आः संविधानसभाया म्याद निदँया थासय् प्यदँ जक मखु, 'विशेष परिस्थितिइ' नं म्याद थपे याये फइ धइगु बुँदा थपे याकेगु ज्या जुइफु धाःगु दु ।
उखे संविधानसभाया म्याद थपे यायेगु खःसा १० बुँदे सर्त पूरा यायेमाः धकाः नेपाली कांग्रेसं तयाच्वंगु सर्तयात संवोधन याये कथं माओवादीं थीथी शिविरस्थित कन्टेनरय् तयातःगु ल्वाभःया ताःचाः विशेष समितियात बुझे यायेगु ज्या जुइफु धयातःगु दु ।
म्याद थपे मजूसा छु जुइ?
यदि थःपिनि सर्त पूरा मयात धाःसा संविधानसभाया म्याद थपे याये मखु धकाः नेपाली कांग्रेसं पिने सरकारयात ख्याच्वः बियाच्वंसां यदि धाथें संविधानसभाया म्याद थपे मजुल धाःसा वयां लिपा छु जुइ धकाः विश्लेषण याकेगु ज्या नं शुरु याकूगु खँ सीदुगु दु। पार्टीया छथ्वः वरिष्ठ नेतात व छुं विज्ञत तयाः थुकिया बारे आन्तरिक सहलह शुरु याकूगु खँ सूत्रं धाःगु दु। म्याद थपे मजूगु अवस्थाय् विकास जुइफुगु फुक्क हे संवैधानिक व राजनीतिक एवं अराजनीतिक अवस्था बारे सहलह जुयाच्वंगु खँ धाःगु दु ।
