सभासद्जु, बधाई !

सूर्यमान राजभण्डारी

उकुन्हु छम्ह पासां थौकन्हय् छुं च्वयेगु मयाना ला धकाः न्यन। च्वःसा फुसा वइ, च्वयेगु ज्या न्ह्याका च्वनेमाः धकाः सल्लाह बिल, जिं मनन याना। च्वये माःगु खँत यक्व दु तर दक्वं खँ च्वयां नं साध्य जुइ मखु। थौकन्हय् सकसियां मनय् धौ बजि वालाच्वंगु अले च्या पसलय्, भट्टी पसलय्, ज्यासलय्, मनूतय्गु पुचलय् दक्वं थासय् 'हट केक' जुयाच्वंगु 'संविधानसभा व उकिया म्याद थप' विषय जुयाच्वंगुलिं संविधान पूमवंकुसें संविधान सभाया म्याद जक थप याइपिं ६०१ सभासद् भाजु मय्जुपिंत बधाई पौ च्वयेगु बिचाः याना। संविधानसभाया म्याद थप हे मजूनि, आवंनिसें बधाई छाय् धायेफु। सकसिनं सिउ, फय् मवयेकं हः सनी मखु, उकुन्हु हे थौकन्हय्या उपप्रधान व गृहमन्त्री भाजु कृष्णबहादुर महरां छगू ज्याझ्वलय् 'झिन्यान्हुया दुने महत्वपूर्ण राजनैतिक सहमति जुइ' धकाः धाःबलय् सकसिनं थुइका काल हे जुइ। अले माओवादी अध्यक्ष भाजु प्रचण्डं निदँ स्वदँया दुने न्हूगु संविधान तयार जूगु संसारय् गनं हे मदु धयाः 'म्याद थप'या निंतिं ल्हाःचिं तःगु सकसिनं तायेकल हे जुइ। संविधानसभाया ई दतले फुसा थःगु सरकार दयेकेगु मफुसा दुगु सरकार क्वःथलेगु कासाय् तःधंगु पार्टीत तक्यनाच्वन, प्रधानमन्त्री छकः जुइत तःक्वः चुनाव यानाच्वन। प्रधानमन्त्री छम्ह ल्ययेत झिंन्हय्क्वः चुनाव जूगु संसारय् गनं दु ला? व नं मत्याइगु चुनाव। आः सविधानया चिन्ता जुल, संविधानसभाया म्याद थप याये हथाय् जुल। धाइगु नं दु नि छु याये त्ययेवं छु याये हथाय् धकाः। हथाय्सं भ्वय्भ्वय् कनाः उकुन्हु संसद सचिवालय सिंहदरवारय् दर्ता याये माःगु म्याद थप प्रस्ताव संविधान सभा भवन बानेश्वरय् दर्ता याः वन। 'ज्याखँ छखेपाखे, दाखि (नाम्लो) ज्वनाः थिमिपाखे' अथें धाःगु मखु जुइ। संविधानसभाया 'काउण्ट डाउन' न्ह्यज्याना वःलिसे सभासद् भाजु मय्जुपिनि न्ह्यः नं मवः जुइ। न्हापा लिपा ला संविधानसभा भवनय् हे झुकुझुकु न्ह्यः वः नि मखुला। 'इलेभेन आवर' जूसां न्ह्यः मवयेके माःगु छुं हुनि मदु, थगुने आर्यघाटय् थ्यंगु संविधानसभायात चान्हय् पौने बाह्र बजे पुनर्जीवित याःगु ल्वःमं मजूनि जुइ। उबलय् १५ मिनेट लिपा लाःगु जूसा छु खः छु खः का। तर ढुक्क जुयादिसँ, सभासद् भाजु मय्जुपिं, थुगुसी थथे जुइ मखु जुइ ।

छाय्धाःसा स्वब्वय् निब्व बहुमत दुगु सरकारं शान्ति प्रकृया व संविधान दयेकेगुली स्वयां संविधानसभाया म्याद थपया निंतिं छधी छप्पँ जुयाः सहमति यायेत्यंगु दु। नेपाली कांग्रेस व मधेसवादी पार्टी फोरमं नं संविधानसभाया म्याद थपया निंतिं सहमत जुइ मखु धकाः धाःगु मदु खालि छगू निगु शर्त धस्वाकूगु जक खः। थःगु नेतृत्वय् राष्ट्रिय सहमतिया न्हूगु सरकार माः धकाः मौकाय् चौका ह्वाःगु जक खः। सहमतिया सरकार दयेकेत प्रधानमन्त्रीं राजीनामा बीमाल धकाः थःगु हे पार्टीया नेता भाजु केपी ओलीं घुर्की न्यंकेवं टर्की भ्रमण चीहाकः यानाः प्रधानमन्त्री भाजु खनाल स्वदेश लिहां वयेमाल। सरकारी गाडी, सरकारी चिकं व सरकारी सुरक्षाकर्मी छ्यला वयाच्वंम्ह ओली भाजुं थःगु हे पार्टीया सरकार ग्वारा तुइकाः थः प्रधानमन्त्री जुइत शकुनी चाल म्हितूगुलिं मेमेगु पार्टीं नं छ्वःगु मी घ्यः लुइगु ज्या याःगु जकं खःला?

सरकार ग्वारातूसां मतूसां सभासद् भाजु मय्जुपिं छगू छु खँय् छग्वारा जुइ माल धाःसा आवंनिसें चुनावय् बूपिं नेतात मन्त्री/प्रधानमन्त्री जुइ दइ मखु धकाः संवैधानिक व्यवस्था यायेमाल। थथे जुल धाःसा जक चुनावय् बूपिं नेतात मन्त्री/प्रधानमन्त्री जुइत आशाकुति जुइ मखु। घरिघरि सरकार क्वःथलेगु/थनेगु कुतः जुइ मखु। अले जक थप म्याद दच्छिया दुने याउँक संविधान च्वयेगु ज्या क्वचायेके फइ। मखुसा कुनुकुनु तं पिकयाच्वंपिं जनतां 'झापड' जक मखु, विद्रोहया नेकू चिनाः सकलें सभासद् भाजु मय्जुपिंत च्वयेत तकं लिचिली मखु। थ्व खँ थुइकाः थप म्यादया दुने संविधान च्वयेत सभासद् भाजु मय्जुपिं न्ह्यचिली जुइ। धाइपिंसं धाइ का, संविधानसभाया दछिया म्याद थप यानाः दुगु/खसिया कवाब जक मखु दुगुम्ह/खसिम्ह हे भपीगु जुल धकाः। तर खं ला, गुलि थाकु म्याद थप यायेत। 'धायेत अःपु, धरग्वारा तःपु।' अय्नं ढुक्क जुयादिसँ, विपक्षीतय्गु सर्त पूवंसां मवंसां, अनेकथंया पंगःत वःसां संविधानसभा भंग जुइगु लक्षण खने मदु। वइ, हानं वइ, आर्यघाटय् थ्यंक वनेमाःसां म्याद थपया पूर्जा ज्वनाः संविधानसभा लिहां वइ। न्हिछि चछि कुतः यानाः जूसां दच्छिया निंतिं म्याद थप जुइ। जिं धायेगु थुलि हे जक खः 'सभासदजु, बधाई !'

www.thesuryaman.blogspot.com

More Stories Like this