थौं जनप्रदर्शन व धर्ना

येँ (झीगु स्वनिगः)

नेवाः स्वायत्त राज्य मंकाः संघर्ष समितिया ग्वसालय् नेवाः व तामाङ्ग लगायत आदिवासी जनजातितय्सं जनप्रदर्शन लिसे धर्ना बीत्यंगु दु । थनया धरहराय् न्हिनसिया छताः इलय् मुना नेवाः, तामाङ्ग लिसे आदिवासी जनजातितय्गु अधिकार सुनिश्चित यायेत थुगु कथं जनप्रदर्शन व धर्ना बीत्यंगु खः । संघीय लोकतान्त्रिक गणतन्त्र, धर्म निरपेक्षता, स्वशासन लिसे जातीय स्वायत्तता, अग्राधिकार व आत्मनिर्णयया अधिकारयात न्हूगु संविधानय् सुनिश्चित यायेमाःगु धासे उगु ज्याझ्वः यायेत्यंगु खः । संविधानसभा विघटन यानाः न्हूगु चुनावय् वनेमाः धायेगु अन्ततः संविधानसभां न्हूगु संविधान दयेके मबीगु खः । अथेहे, धर्म निरपेक्षताया विरुद्ध हिन्दू राज्य दयेकेमाः धायेगु नं प्रतिगामी बिचाः खः । इलय् हे संविधानय् अग्रगामी व प्रगतिशील अवधारणा कथंया संविधान पितबीगु नितिं नेवाःत सकसियां ब्वति कायेमाःगु थौंया आवश्यकता खः ।