संसदवादीनिसें राजावादीतय्गु चहलपहल अप्वल

रुपा महर्जन

संविधानसभाया म्याद तनेगु वा मतनेगु उकिया नितिं निन्हु जक ल्यं दनि । संविधानसभाया भवनय् जक मखु फुक्क थासय् सुरक्षा ब्यवस्था तच्वयेकाः हयाच्वंगु दु । म्हिगः सुथनिसें संविधान सभा भवनया सुरक्षाया नितिं धासें न्हू बानेश्वरनिसें मीनभवन तक्कया पानी ट्याङकी ल्यूनेया लँय् गाडी छ््वःगु मदु । अथेहे, मेमेगु थासय् नं सुरक्षा ब्यवस्था तच्वयेकूगु दु । जनताया संविधान दयेकेगु प्रतिबद्धता प्वंकाः संविधानसभाया चुनावय् जनतां त्याकाः छ्वःपिं मनूत थौं जनताया संविधान च्वयेगु गन गन थःथःगु भागबण्डाया नितिं लुछाचुडीया अवस्थां न्ह्यःने वनाच्वंगु दु । मानौं कि नेपालय् गणतन्त्र हे वयेधुंकल, जनतां धइथे फुक्क जिइगु जुइधुंकल धइगु कथं थःथः दथुइया ल्वापुं थौं फाइदा यथास्थितिवादीतय्सं कायेगु कुतः यानाच्वंगु दु ।

जनताया संविधान च्वइपिनिगु थज्याःगु हर्कत जुयाच्वंगु इलय् हाकनं छक्वः जनतां लिनाः छ्वये धुंकूगु राजतन्त्र व उकिया समर्थन याइगु छगू जक राजावादी पार्टी राप्रपां नेपाःया संविधानसभाया ई तने मज्यूगु, थुकियात विघटन यायेमाःगु, हाकनं हिन्दू राष्ट्र घोषणा यायेमाःगु धासें म्हिगः निसें संविधानसभा भवनय् घेराउ यानाः १७ गते तक्कया ज्याझ्वः घोषणा यायेगु आँट याःगु दु । संसदवादी दलत थःथःगु थासय् ल्वानाः च्वनेगु अले स्वभाविक कथं राजावादीपिंसं थज्याःगु चहलपहल याइगु निश्चित नं जुइ । थुलि जक मखु स्वनिगः दुने नापं शिव सेनाया नामय् म्हिगःनिसें जुलुस याःगु दु । स्वनिगः गुगु थासय् नेवाः स्वायत्त राज्य धकाः निक्वः निक्वः घोषणा याःगु थाय् खः । थज्याःगु थासय् नापं उमिसं हिन्दू राष्ट्रया घोषणा यायेमाःगु माग यासें जुलुस याइगु धइगु बिडम्बनाया खँ खः ।

अथेहे, हिन्दू राष्ट्रया माग यासें विश्व हिन्दू महासंघ लगायतया संगठनतय्सं बन्दया हुनिं मध्यपश्चिमया जनजीवनय् याःगु प्रभाव, बन्दया न्हापांगु न्हि म्हिगः मध्यपश्चिम क्षेत्रया उद्योग, कलकारखाना, शिक्षण संस्था, यातायात संस्थाया याःगु बन्दं जेठ १४ तक्कया दुने छुं छुं जुइफु धइगु संकेत क्यंगु दु । हिन्दू महासंघ लिसे प्यंगू थीथी संगठनं नेपाःयात हाकनं हिन्दू राष्ट्र घोषणा यायेमाःगु, धर्म हिलेमज्यूगु धासें उगु ज्या बन्द यायेमाःगु थज्याःगु माग तयाः निन्हुयंकया बन्दया इनाप याःगु खः । छखे दलत दुनेया ल्वापु मेखे राजावादीतय्गु चहलपहल फुक्क भारतया ग्राइण्ड डिजाइनय् जुयाच्वंगु दु । पुलांगु संसदवादी दलतय्त सिइकं मसिइकं डिजाइन अन्तर्गत प्याखं हुइकाः तःगु दु । उमिगु हे डिजाइन अन्तर्गत छुं ई न्ह्यः जक फोरमयात हाकनंं तःछ्यायेगु ज्या यायेधुंकूगु दु । अझ नं अज्याःगु संसदवादी दलत अकर्मण्यताय् चाहिलीगु ज्या जुयाच्वंगु दुसा अवश्य नं राजावादी जक मखु राजतन्त्रं हे छ्यों ल्ह्वनीगु सम्भावना अप्वःगु दु ।

उकिं तःधंगु राजनैतिक दल धइपिं, जनतां संविधान च्वयेगु नितिं छ्वःपिं फुक्क दलया नेतात, सचेत नेपाली जनतातय्गु न्ह्यःने जेठ १४ गतेया तसकं हाथ्यां जाःगु ईकथं न्ह्यःने वयाच्वंगु कारण फुक्क सचेत जुयाः न्ह्याय्माःगु अवस्था थन ब्वलंगु दु ।