संविधानया अतिरञ्जित प्रचारवाजी : अध्यक्ष प्रचण्ड

येँ (झीगु स्वनिगः)

एकीकृत नेकपा माओवादीया नायः पुष्पकमल दाहाल प्रचण्डं भत्ता मकासे ज्या यायेगु प्रतिबद्धतालिसे लिपांगु खुसिइ हाकनं छक्वः संविधानसभाया ई तनेत प्रस्ताव यानादीगु दु । येँय् बुधवाः सुथय् याःगु छगू ज्याझ्वलय् न्वंवानादिसें भत्ता मकायेगु प्रतिबद्धतालिसे प्रस्ताव यानादीगु खः । वय्कलं संविधानसभाया ई लिपांगु खुसिइ तनेमाःगु धयादिसें शान्ति प्रक्रियाय् आपालं प्रगति जूगु व संविधानसभां नं थःगु ज्या यानाच्वंगु दाबी यानादीगु दु । संविधान निर्माण व शान्ति प्रक्रिया गन खः अन हे दु धइगु अतिरञ्जित प्रचारबाजी याःगु धयादिसें प्रचण्डं अज्याःगु भ्रमय् मलायेत जनतातय्त इनाप नापं यानादीगु दु । संविधान च्वयेगु झ्वलय् खनेदुगु निसः व न्यय्गू स्वयाः आपालं विवाद ज्यनाः नीछगू थ्यंगु, अनमिन वनेधुंकाः दलतय्गु थःपिनिगु हे निर्णयपाखें शान्ति प्रक्रिया अनुगमनया मोडेल तयार यायेगु, माओवादी जनसेना विशेष समिति मातहत वःगु व बहालवाला सेना, जनसेना व निगुलिं प्रहरीया अनुगमनकर्ता अस्थायी शिविर अनुगमनय् छ्वयेगु शान्ति प्रक्रिया व संविधान निर्माणया महत्वपूर्ण उपलब्धि जूगु वय्कःया धापू खः ।

प्रचण्डं नेपाली कांग्रेस थेंज्याःगु ताःहाकःगु लोकतान्त्रिक अभ्यासपाखें न्ह्यानाच्वंगु पार्टी संविधानसभाया ई मतंसे विघटनया पक्षय् दनेगु थःम्हं बिचाःतकं मयानाःगु बिचाः तयादीगु खः । उगु हे ज्याझ्वलय् प्रमुख प्रतिपक्षी दल नेपाली कांग्रेसया उपसभापति लिसे संसदीय दलया नेता रामचन्द्र पौडेलं राजनीतिक दलतय्गु हे कारण देय् दुर्घटनाया संघारय् थ्यंगु धयादीगु दु । कांग्रेसं न्ह्यःने न्ह्याकूगु झिगू बुँदे सर्तय् न्हूगु खँ छु नं मजुसे माओवादीं न्हापा सरकार व दलतलिसे याःगु बचं कार्यान्वयन यायेमाःगु माग दुगु पौडेलया धापू खः । झिगू बुँदे मध्ये छुं माग याकनं कार्यान्वयन जूसा थःगु पार्टी संविधानसभाया ई तनेगु नितिं तयार दुगु धयादिसें ल्यं दुगु विषयसं निश्चित कार्यतालिका दयेकाः न्ह्यःने न्ह्यायेफइगुलिइ बहः बियादीगु दु । अथेहे मधेशी जनअधिकार फोरमया नायः लिसे परराष्ट्रमन्त्री उपेन्द्र यादवं चाचां करोडौं तका धेबा इनाः थःगु पार्टी तछ्याःगु द्वपं नापं बियादीगु दु । यादवं फोरम तछ्यायेगु छु नं पार्टी विरुद्ध जक मजुसे देय्, शान्ति प्रक्रिया व संविधानसभा विरुद्ध जूगु धयादीगु दु । फोरम ल्यू नायः जेपी गुप्तां सोमबाः झिंस्वम्ह सभासद्पिनिगु समर्थनय् मधेशी जनाधिकार फोरम गणतान्त्रिक नांया न्हूगु पार्टी संविधानसभाय् दर्ता याकूगु खः । यादवं नेपाःया राजनीति बुलुहुँ नेपाली दल व नेतातय्गु ल्हातं पिने वनाच्वंगु बिचाः प्वंकादीगु खः । मेगु छगू प्रसङ्गय् यादवं संविधानसभा विघटन जूसा देय् ग्यानापूगु अस्थिरतापाखे वनीगु ख्याच्वः नापं बियादीगु दु ।