द्वःछि त्रिशुल तयाहःगु ट्रक सहित शिवसेनाया नेता ज्वन

येँ (सन्ध्या टाइम्स)/संघीय गणतान्त्रिक संविधानया भावना विपरित धर्म निरपेक्षताया विरोध यासें हिन्दू राष्ट्रया माग यानाः सतकय् तीव्र प्रदर्शन याना हयाच्वंगु हे इलय् येँय् छगः ट्रक त्रिशुल सहित शिवसेना नेपालया नेतायात ज्वंगु दु ।

येँया ठमेल लागाय् प्रहरीं अथे हे द्वःछिगू ति त्रिशुल हयाहःगु ट्रक सहित वयात ज्वंगु खः। त्रिशुल सहित ज्वंम्ह मनू शिवसेना नेपालया केन्द्रीय दुजः त्रिलोक श्रेष्ठ खः धाःगु दु।
शिवसेना नेपालया नेता नापं त्रिशुल ज्वंगु विषययात कयाः प्रहरीं अनुसन्धान यानाच्वंगु दु। प्रहरीं उगु घटना बारे पूवंक जानकारी धाःसा सार्वजनिक याःगु मदुनि ।

येँय् हे इलय् ब्यलय् राजतन्त्रया पक्षय् प्रदर्शन व नारावाजी याना वयाच्वंपिं अतिवादी हिन्दूतय्सं आःया तरल राजनीतिक अवस्थाय् छुं तःधंगु प्रदर्शन यायेगु ताः तयाः पिनें त्रिशुल ज्वना वःगु जुइमाः धकाः अनुमान याःगु दु ।

कट्टर हिन्दूतय् बन्द
विश्व हिन्दू महासंघ, शिवसेना नेपाल नापं हिन्दू धर्मया पक्षधर थीथी च्यागू संगठनत जानाः थौं मध्यमाञ्चल लागा बन्द याःगु दु ।

नेपाःयात हिन्दू राष्ट्र घोषणा यायेमाःगु माग यासें उगु लागाया कट्टर हिन्दूवादी संस्थातय्सं उगु बन्द आह्वान याःगु खः। बन्दं यानाः बाँके, बर्दिया, दाङ, सुर्खेत नापं थीथी जिल्लाया जनजीवन प्रभावित जूगु दु। कट्टर हिन्दूवादीतय्सं थःपिनि माग पूवंकेत बन्द थेंज्याःगु ज्याझ्वः याःगुलिं अन मेकथंया दंगा जुइफइगु अनुमान यासें व्यापक प्रहरी तैनाथ यानातःगु दु ।

जुजुवादीतपाखें संविधानसभा घेराउ
संवैधानिक राजतन्त्र व हिन्दू राज्यया वकालत याना वयाच्वंगु राष्ट्रिय प्रजातन्त्र पार्टी नेपालं थौं संविधानसभा भवन घेराउ याइगु जूगु दु। शान्ति व संविधानया नितिं न्हूगु जनादेशया माग यासें राप्रपा नेपालं थौं सनिलय् संविधानसभा भवन घेराउ यायेत्यंगु खः। सरकारं संविधानसभा भवन लागाय् निषेधाज्ञा जारी यायेधुंकूसां उकियात समेत हाथ्या बियाः थौं घेराउ यायेत्यंगु खः ।