संविधानसभाया म्याद व दलतय् सर्त

मधेसी जनअधिकार फोरमया विभाजन लिपा संविधानसभाय् विपक्षी शक्ति मजबूत जूगु दु। विपक्षीत अल्पमतय् लानाच्वंगु खःसां नं आः संविधानसभा दुई तिहाईया कासाय् तक्यनाच्वंगु कारणं विपक्षीया सः तसः जुया वःगु खः। थ्व इलय् संविधानसभाया म्याद थपे यायेगु लाकि मयायेगु धकाः चर्चा जुयाच्वंगु व उकी विपक्षी पार्टीत थःपिनि छुं सर्त पालना यायेगु खःसा जक थपे यायेगु मखुसा थपे मयायेगु धइगु पक्षय् वनाच्वंगु कारणं सत्तारुढ दलतय्त मछिनाच्वंगु अवस्था वयाच्वंगु दु ।

थौंकन्हय् संविधानसभाया म्याद थपे याये हे माः धकाः लगे जुयाच्वंगु दल माओवादी नं दछि न्ह्यः संविधानसभाया म्याद थपे याये मखु धकाः लगे जूगु पार्टी खः। अबलय् माओवादी सरकारय् मदु। आः नेपाली कांग्रेस व सरकारय् दुमथ्याःगु एमालेया छगू गुट संविधान-सभाया म्याद थपे याये मखु धइगु पक्षय् वनाच्वंगु दु। थ्व ल्याखं स्वयेबलय् छु खने दइ धायेबलय् संविधानसभाया म्याद थपे यायेगु लाकि यायेगु मखु धइगु खँ वस्तुगत विश्लेषणया लिधंसाय् स्वयां नं थःपिं सरकारय् दु लाकि मखु धइगु खँया आधारय् दलतय्सं निर्णय याइगु जुयाच्वन। संविधानसभा धइगु दलतय् निंतिं संविधान दयेकेगु थाय् स्वयां नं थःपिनि सरकार गठन यायेत छ्यंग्वः खाकेगु हुल थें जक जुयाच्वंगु दु। अय् जुयाः थुकिया म्याद थपे यायेगु थेंज्याःगु विषययात उमिसं थःथःगु स्वार्थ कथंया सर्त पूवंकेगु मौका कथं छ्यलाच्वंगु दु। थ्व वास्तवय् दलतय्सं विकसित घटनाक्रम कथं यानाच्वंगु खः लाकि देशय् संविधान हे पित मबीगु लागिं ह्यकथं जक यानाच्वंगु खः, थ्व आशंका आः तीव्र जुया वःगु दु ।

More Stories Like this