नाराय् सीमित पर्यटन वर्ष

नरेन्द्रमान श्रेष्ठ 'गोंगजु'

नेपाः थौंकन्हय् पर्यटन वर्ष २०११ माने यानाच्वंगु दु। थुगु पर्यटन वर्षय् १० लाख विदेशी पर्यटक नेपालय् दुकायेगु योजना नं दयेकाच्वंगु दु। थ्व योजनायात गुलिसिनं सरोकारवालातय्सं गफ जक त्वःताच्वंगु धकाः आलोचना नं यानाच्वंगु दु। राज्यं करोडौं तका खर्च यानाः दशरथ रंगशालाय् भव्य ज्याझ्वःया दथुइ पर्यटन वर्षया घोषणा याःगु खः। घोषणा धुंकाः आः देशय् आशा याना कथं पर्यटक दुहां वइ ला वा पर्यटन वर्ष सफल जुइ ला धइगु न्ह्यसः पिहां वयाच्वंगु दु। नेपालय् न्ह्यागु छगू ज्या जूसां उद्घाटन चाहिं भव्य जुइ। अझ जिउसा उद्घाटन ज्याझ्वलय् हे घोटाला जुइ। थुकी मजुल धाये फइगु अवस्था मदु ।

नेपाःया आर्थिक विकासया मू आधार हे पर्यटन खः। तर थ्व यथार्थयात सरोकावालातय्सं थुइके फयाच्वंगु मदु। पर्यटन वर्ष २०११ य् १० लाख पर्यटक नेपालय् हयेगु घोषणा याये न्ह्यः नेपाःया पर्यटन विकासया लागि अन्तर्राष्ट्रिय स्तरय् थुकिया गुलि सम्भावना दु थुइके माःगु खः। प्रचार-प्रसार व पर्यटन प्रवर्द्धनया गुलि सम्भावना दु, गुलि तक पर्यटक आकर्षित यायेफु धयागु न्हापां थुइकेमाःगु खः। तर सम्बन्धित निकायतय्सं थुकी उलि विचाः याःगु मदु। नेपाःया आर्थिक विकास यायेगु, नेपाःमितय्गु आर्थिक उन्नति यायेगु खःसा पर्यटन ख्यः छगू बांलाःगु व बल्लाःगु माध्यम खः। पर्यटनया विकासं नेपाःयात गरिब राष्ट्र मखु छगू समृद्ध राष्ट्रया रुपय् धस्वाके फइगु व छगू पर्यटकीय गन्तव्य कथं म्हसीकेगु सम्भावना दु ।

पर्यटन ख्यः विकासया लागिं ततःधंगु होटलय् ततःधंगु गोष्ठी, कार्यशाला जुइ। पर्यटनया विकासया निंतिं पर्यटन मन्त्रालय हे स्वनातःगु दु। पर्यटन बोर्ड धकाः अलग्ग हे दु। उलिमछि सरकारी व गैरसरकारी संगठनत दु। अय्नं पर्यटन ख्यःया उलि विकास जुइ फयाच्वंगु मदु। नेपालय् राजनैतिक स्थिरता मदु। खुलाय् छक्वः सरकार परिवर्तन जुइ। प्रधानमन्त्री नियुक्ति जूगु निला तक मन्त्रिपरिषद् गठन मजुइगु देय् खः झीगु। अले देय्या हरेक थासय् राजनैतिक हस्तक्षेप जुइगु देय् नं झीगु हे खः। राजनैतिक हस्तक्षेपं यानाः देय्या दुर्दशा जुयाच्वंगु दु ।

सरकार हिलेवं पर्यटनमन्त्री नं हिली। अझ पर्यटन सचिव तकं हिली। पर्यटन बोर्डया पदाधिकारीत हिली। थुज्वःगु अवस्थाय् गनं जुइ पर्यटनया विकास? थज्याःगु राजनैतिक हस्तक्षेपं अनैतिक ज्या नं अप्वया वनाच्वंगु दु। भ्रष्टाचार अप्वयाच्वंगु दु। वित्तीय ख्यः, बैंक, उद्योग, कलकारखाना, स्थानीय निकाय, सार्वजनिक संस्थान, पर्यटन नापनापं प्रशासनिक संयन्त्र, प्रहरी प्रशासनय् नापं राजनैतिक हस्तक्षेप जुयाच्वंगु दु। अले गथे जुइ देय्या विकास, पर्यटनया विकास?

पर्यटन विकासया निंतिं देशय् शान्ति जुइमाः, सुरक्षा बांलायेमाः, चाःहिउ वइपिं विदेशी पर्यटकतय्त निर्धक्क जुइक चाःहिलेगु ह्वःताः चूलायेमाः। तर दुःखया खँ, देय्या शान्ति सुरक्षा धमाधम स्यना वनाच्वंगु दु। देशय् न्हियान्हिथं हत्या, हिंसा, अपहरण, लुटपाटया ज्या अप्वयाच्वंगु खनेदु। थथे देय्या राजधानी हे न्हियान्हिथं आपराधिक गतिविधि अप्वयाच्वन। सर्वसाधारणंनिसें व्यापारी, नेता, मन्त्री तकं आपराधिक पुचःया निशानाय् लानाच्वंगु दु। अले राज नैतिक दलत थीथी राजनैतिक दलतय् भ्रातृ संगठनत, थीथी पेशागत संगठनया विकासया बाधा खः ।

पर्यटन ख्यःया विकास व विस्तारया निंतिं पलिस्था जूगु पर्यटन बोर्ड नं पर्यटनया विकास व विस्तार यायेगु स्वयां नं राजनीति यायेगु अखडा थें जुयाच्वंगु दु। पर्यटन बोर्डं पर्यटन विकासया निंतिं अन्तर्राष्ट्रियस्तरं प्रचार-प्रसार व पर्यटन प्रवर्द्धनया निंतिं उलि ज्या याये फयाच्वंगु मदु। धायेमाल धाःसा पर्यटन बोर्ड जुइमा वा निजी ख्यःया निकाय छाय् मजुइमा, पर्यटन ख्यःया विकास व विस्तारया निंतिं व पर्यटन वर्ष २०११ या प्रवर्द्धनया ठोस ज्याझ्वः व योजना मदु धाःसां जिउ। खालि पर्यटन वर्ष २०११ य् १० लख पर्यटक दुत हयेगु नारा जक थ्वयेकां पर्यटन वर्ष २०११ सफल जुइ मखु। पर्यटन वर्ष २०११ या न्याला फुत धाःसां जिउ। आः ल्यं दनिगु स्वला जुन, जुलाइ व अगष्ट जक पर्यटनया निंतिं अफ सिजन खः। अले बाँकी प्यला पर्यटनया सिजन दनि। आःया सन्दर्भय् थ्व अफ सिजन नेपाःया पर्यटन विकासया सम्भावनाया आधारय् अन्तर्राष्ट्रिय स्तरं नेपाःया पर्यटन वर्ष २०११ या ठोस योजना कार्यक्रम नापं प्रचार-प्रसार याये फत धाःसा नेपालय् नं पर्यटन विकासया निंतिं पूर्वाधार दयेका वने फत धाःसा वइगु सेप्टेम्बर महिनांनिसें डिसेम्बरतक बांलाः जुइफु ।

नेपाः प्राकृतिक रुपं सुन्दर व मनमोहक देय् खः। नेपालय् प्रकृतिया सुन्दर उपहारकथं थीथी प्राकृतिक सम्पदा, साँस्कृतिक सम्पदा, कला, संस्कृति व पर्वय् तःमि देय् खः तर थुकिया अन्तर्राष्ट्रिय स्तरं उपयोग धाःसा सम्बन्धित सरोकारवालातय्सं याये फयाच्वंगु मदु। नेपाः बाह्य पर्यटक जक मखु आन्तरिक पर्यटनया नं उलि हे सम्भावना दुगु देय् खः। थुकिया निंतिं नेपाःया पर्यटन ख्यःया विकास यायेगु जिम्मा कयाच्वंपिं सम्बन्धित सरोकारवालात इमान्दार जुयाः ज्या यायेमाः। मखुसा पर्यटन वर्ष २०११ नाराय् जक सीमित जुयाः व्यवहारय् सफल जुइ फइ मखु। उकिं गबलय् तक राज्यं पर्यटन विकासया निंतिं स्पष्ट दृष्टिकोण व ठोस ज्याझ्वः न्ह्यब्वयाः योजनाकथं इमान्दार जुयाः थःगु जिम्मेवारी पूवंकी मखु अबलय् तक नेपाःया पर्यटन व्यवसाय केवल नाराय् जक सीमित जुयाच्वनी ।

More Stories Like this