सुरक्षा अवस्था व झीगु आवश्यकता

जयदेव बोहरा

नेपालय् सुरक्षा सम्वन्धी निता खँ नेपाली जनता अजू चाः । न्हापांगु खँ विदेशीं सलंसः थासय् सैन्य हस्तक्षेप यानाः भूमि आक्रमण यानातःसां नेपाली सेनां चुइक नं नवाःगु मदु । नेपाली सेनायात न कालीपानीं नुगलय् थ्यूगु दु, नत दक्षिणी सीमानाय् विदेशी सेनाया बुटं न्हुयाच्वंगु खँय् कयाः स्याःगु दु । चांचां सीमास्तम्भत थःपिन्थाय् दुहां वयाः देय् झंझं चिचीकू जुयावयाच्वंगु खँय्हे चिउताः काःगु दु । थथ्य राष्ट्रया सुरक्षाया प्रमुख दावेदार अंगःया थुज्वःगुकथंया हर्कत् अजू चायापु । निगूगु खँ, नेपाली जनतां थःगु जा नयेगुलिइ म्हो यानाः नेपाली सेनायात लहिनातःगु दु । देय् व जनताया सुरक्षा जुइमा धकाः, तर विडम्वनाः नेपाली जनतां सीमा क्षेत्रय् कथित एसएसबी नांया पुचलं न्हि न्हिथं दायेकाः व लुटय् याकाः च्वनाच्वनेमाःगु दु । म्ह्याय् मस्तय्गु इज्जत तंका च्वनेमाःगु दु । छेँ चुँ ज्यू धन तंका च्वनेमाःगु दु । तर नेपाली सेनाया हाकिमतय्सं थः काय् म्ह्याय् पिनिगु ब्याः भ्वय् न्यायेकाः करौडौंया सम्पत्ति फुकेगुली धेंधें बल्लाः कासाय् ब्वतिकाकां फुर्सद मदु । वनं जनताया करं ।

नेपाली सुरक्षावारे गम्भीर जुयाः विचाः यायेगु हरेक नेपाःमिया दायित्व खः । झीगु देय् विदेशी हस्तक्षेपं आक्रान्त दु । विदेशीया संकेट विनाः प्रधानमन्त्री चुनय् यायेत ताःमलाःगु राजनीतिक अवस्थाय् हस्तक्षेपया हद पूगु दु । तत्कालिन शाही सेनां जर्मनी राइफल जी ३६ थयेकाःनं न्यायेमफूगु व थुकिया पल्सा भारतीय इन्सास राइफल वाध्य जुयाः न्यायेमाःगु खँ झीगु देशय् विदेशी आर्थिक व सैनिक हस्तक्षेप जुइगु खँ स्पष्ट दु । नेपाःया सत्या स्वयाः अप्वः थासय् विदेशी सेनां भूमि अतिक्रमण यानातःगु दु । झीगु मातृभूमिइ जुयाच्वंगु ज्यादतीया विरुद्ध नेपाली सेनाया ल्वाभःत छुंहे मखु । तर नेपाली जनताया विरुद्ध उगु ल्वाभःत छ्यलेगु यानावयाच्वंगु दु । तत्कालिन रक्षामन्त्री नापं सरासर फय्गं खँ ल्हानाः जनताया मिखाय् धुलं छ्वाकेत स्वयाःच्वंगु दु । नेपालय् राजतन्त्र दत्तले नेपाली सेनाय् सुनं जनजातिं च्वय्या पदय् गवलें थ्यंगु मदु । सेनाया उच्च नेतृत्वय् न्ह्यावलें शाह, राणा, वस्नेत, थापा, पाण्डेत जक थ्यंगु दु । सामन्ती राजतन्त्रात्मक राज्य व्यवस्था ल्यनाच्वंगु जूसा छत्रान गुरुङ्ग गवलें नं प्रधानसेनापतिं जुइगु खँ कल्पना तक यायेफैमखु जुइ । सामन्तीतय्गु मिखाय् जनजातित क्वह्यंपिं खः ।

नेपाली सेनाया गुलिख्य पुलांगु सामन्ती सोच लहिनातःपिं हाकिमत व गुलिखय् राजनीतिक दलया नेता धयातःपिसं जनमुक्ति सेनाया योग्यता व क्षमता मदु धकाः मनोवल क्वपालेत स्वइ व नेपाली सेना फुक्ककथं फिट दु धकाः वकवास यायेगु खः । थ्व इमिगु नेपाली सेनायात थःगु खल्तिइ तयाः, भ्रष्टाचार यानाः कमय्याःगु अकुत सम्पत्तिया रक्षा यायेगु, थःम्हं यानागु कुकृत्य अपराधत सुचुकेत व थःगु स्वर्गया संसार ल्येकातयेत नेपाली सेनायात छ्यलेगु कुटिलचाल वाहेक मेगु छुंनं मखु । योग्यता व क्षमताया तुलना यायेगु खःसा जनमुक्ति सेना नेपाली सेना स्वयाः गुणात्मक रुपय् यक्को न्ह्यःने दु । जनमुक्ति सेनानाप कथि, खुकुरी व भरुवा वन्दुकया भरय् मेसिनगनत कब्जा यायेगु क्षमता दु । गुगु खँ जनमुक्ति सेनां विगतया इतिहासय् पुष्टी यायेधुंकूगु दु । जनमुक्ति सेनानाप माल धाःसा विना तलव नःन्हु आत्मनिर्मर जुयाः शत्रु विरुद्ध ल्वायेगु कला व सीप दु । गुगु खँ जनमुक्ति सेनां विगतया तःन्हुया व्यवहारं पुष्टी यानाः वःगु खः । झीगु देशय् वःगु संकटया विरुद्ध ल्वायेत लाखौं करौडौं नेपाःमि जनतायात खुसिं परिचालन यायेफूगु क्षमता तइ । जनमुक्ति सेना जनताया छेँय् वनाः काय्म्ह्याय्पिनिगु हैसियत व मां-बौया थें माया काइ । जनमुक्ति सेना जनतां छुं कायेगु व जनतायात अप्वः वीगु सिद्धान्तय् निपूर्ण दु । उकिं जनताय् निर्भर जुयाः म्वायेफु । जनताया दुःख व पीडा थुइकेगु अले जनतानाप सुख व दुःख इनेफैगु क्षमता नं जनमुक्ति सेनायाके दु ।
जिं स्वये, जनमुक्ति सेनाय् दुगु च्वय् न्ह्यथनागु क्षमतामध्ये छगू नं मदु नेपाली सेनायाके । छु नेपाली सेना विना तलव देय् व जनताया हितया नितिं हि बाहाः न्ह्याके फुला ? गथ्य जनमुक्ति सेनां फु । युद्धकालय् शाही सेनां लहिनातःपिं दुगुचा, खा स्यानाः नयाविल धकाः जनतां सराः बीगु याइसा जनमुक्ति सेनाया नितिं स्वांमाः ल्हातय् कयाः लसकुस यायेत गांया मूलँय् दनाच्वनी । थुकिं नं जनमुक्ति सेनाया क्षमता, दक्षता, आवश्यकता व हार्दिकता सीके फु ।
स्थायी शान्ति कायम यायेत सेना समायोजन अपरिहार्य दु । नेपाली सेनाया छुं अधिकृतत व सुंसुं नेता धाःपिसं नेपाली सेनाया मापदण्डकथं जक समायोजन जुइ धकाः त्वह तयेगु तसकं गलत खः । पुलांगु सेनाय् राणा, काजी खान्डानया मनूत जक सेनाया नेतृत्व तहलय् थ्यंकेगु मापदण्ड दुगु खः । अथ्यहे यानाः जर्नेल कर्नेलया कायम्ह्याय् योग्यता गाःसां मगाःसां जर्नेल कर्नेल जुइमाःगु मापदन्द दुगु खः । प्रधान सेनायात जुइगुनितिं शाही, राणा खान्दान जुइमाःगु दु । तर जनमुक्ति सेनाय् शाही, राणा परिवारया छगू नं जुइफु ।

गनतक्क तालिमया खँ दु, गुलिखय् सीकेमाःगु खँत जनमुक्ति सेनां नं तालिम कायेमाः । तर नेपाली सेनायात जनमुक्ति सेनां यक्को स्यनेमाः व यक्कों खँया तालिम वीगु जरुरी दु । नेपाली सेना जुजु शक्तिइ दु वलय् राणाया सेना दयेकेगु प्रचलन खः । उकिं सकसितं तालिम वियाः जनताया सेना दयेकेगु आवश्यक दु । हाकिमं अय्लाःया तालय् ठोक धालकि निर्दोष जनतायात हानं ठोकय् यायेगु गुगु यान्त्रिकता पुलांगु सेनाय् दु । दुश्मन व थः छुटय् यायेमफु बलय् उकियात ठीक यायेत नं जनमुक्ति सेनाया तालिम वइगुनितिं आरय् जुइ । थुया लिपा जक नेपाली सेना जनताया जुइफु ।
न्ह्यात्थे थजु विगत युद्धकालया खँत ल्होनेगु धयागु गुंगु छवय् लखं छ्वाके थें खः । उकिं पाउँगु व मसाःगु विगतपाखे मवने । बरु झीगु देय्या बांलाःगु भविष्य, सुख, शान्ति, सम्पन्नता जनताया शक्तिशाही, विकसित स्वाभिमानी राष्ट्र दयेकेगुपाखे सकलें लगय् जुइगुहे बुद्धिमानी जुइ । आःनेपाःमित छ्यालब्याल जुयाः मखु, छप्पँ जुयाः लगय् जुइमाः । नेपाली सेना, प्रहरी, जनमुक्ति सेना मिलय् जुयाः देय् व जनताया सुरक्षा यायेमाः । नेतात जिम्मेवार जुइमाः व प्रगतिशील संविधान दयेकेमाः । देय् व जनताया हितयात ध्यानय् तयाः नीति नियमत दयेकेमाः । जनमुक्ति सेनानं न्ह्यावलें देय व जनताया सुरक्षाया नितिं थःगु कर्तव्य पूवंकी । तर नेपाःया आन्तरिक मामिलाय् विदेशीं नवायेगु खँ सहय जुइमखु ।

More Stories Like this