कांग्रेसपाखें लगातार व्यवस्थपिका संसदय् पंगः
येँ (झीगु स्वनिगः)
प्रमुख प्रतिपक्ष दल नेपाली कांग्रेसं संविधानसभाया म्याद प्यन्हु जक ल्यं दनिगु दिं म्हिगः मंगलवाः नं व्यवस्थापिका संसदय् पंगः थनाः संचालन याके मबिल । वर्तमान सरकारं अन्तरिम संविधान संशोधन यानाः न्हूगु संविधान दयेकेगु नितिं म्याद थप यायेगु नितिं संशोधन प्रस्ताव दर्ता याये धुंकूगु नापं उगु हे संशोधन प्रस्तावयात कयाः सहलह ब्याकेगु नितिं च्वंगु संसदया मुँज्याय् कांग्रेसं पंगः थंगुलिं आः हाकनं थौं संसदया मुँज्या च्वनीगु जूगु दु ।
संसदया मुँज्या न्ह्याके त्यनेवं कांग्रेसया फुक्क धैथें सांसदत दनाः टेबुलय् दायाः विरोध याःगु खःसा अथे प्रतिपक्षं संविधान संशोधनया प्रस्तावयात कयाः विरोध याःगुलिं सभामुख सुवासचन्द्र नेम्वाङं कन्हय् तकया नितिं संसदया मुँज्या स्थगित यानादीगु खः । कांग्रेसं वंगु सोमवाः नं संसदया मुँज्या स्थगित जुइगु कथं पंगः थंगु खः । जनताया सः तयेगु थाय् संसदयात हे न्ह्याके मब्यूगुलिं थःत प्रजातन्त्रवादी नापं लोकतन्त्रवादी धकाः दावी यानाः वयाच्वंगु नेपाली कांग्रेसया थुगु पहः खनाः मनूत अजू चाःगु दु ।
