विद्रोह यायेगु ख्याच्वः

येँ (झीगु स्वनिगः)

एमालेया आदिवासी जनजातिया कार्यकर्तातय्सं पार्टी दुने विद्रोह यायेगु ख्याच्वः ब्यूगु दु । एमालेया महासचिव इश्वर पोखरेलं पोलितब्यूरोया मुँज्याय् न्ह्यब्वःगु राजनीतिक प्रतिवेदनय् संघीयताया सवालय् नेवाः स्वायत्त राज्य मदैगु कथंया खँ हःगुलिं अथे एमालेया कार्यकर्तातय्सं नेतातय्त अथे ख्याच्वः ब्यूगु खः । एमालें संविधानसभाया राज्य पुनर्संरचना नापं राज्यशक्ति बाँडफाँट समितिइ जातीय पहिचान नापं नेवाः प्रदेशयात नं दुथ्याका १५ गू प्रदेशया प्रस्ताव यंकूगु खःसा आः वयाः उकिया अःखः पार्टीया महासचिवं अथे न्हूगु प्रस्ताव हःगुलिं अज्वःगु प्रस्ताव पारित जुल धाःसा थःपिन्सं विद्रोह यायेमाली धकाः ख्याच्वः बियादीगु खः । महासचिव पोखरेलं तयादीगु प्रस्तावय् 'राजधानी नापं महत्वपूर्णगु शहरयात स्वायत्त कस्मोपोलिटन सिटीया रुपय् विकास यायेगु संभावना दु' धकाः न्ह्यथंगु धैगु नेवाः नापं जातीय प्रदेशयात विरोध याःगु खः धकाः कार्यकर्तातय्सं अथे विरोध यानाः विद्रोह यायेगु तकं ख्याच्वः ब्यूगु खः ।

आदिवासी जनजाति संयुक्त संघर्ष समितिया आह्वानय् सोमवाः पार्टीया केन्द्रीया ज्याकू बल्खुइ एमालेया जातीय मोर्चा नेपाल लोकतान्त्रिक आदिवासी जनजाति महासंघया नेतृत्वय् धर्ना च्वनाः ज्ञापन पौ बिइगु झ्वलय् एमालेया कार्यकर्तातय्सं अथे ख्याच्वः बियादीगु खः । एमालेया न्वकु बामदेव गौतमयात ज्ञापन पौ लःल्हायेगु झ्वलय् नेपाः लोकतान्त्रिक नेवाः संघया नायः सानुराजा शाक्यं थःपिनिगु भावनायात थुइकेत इनापयासें पार्टीया मुँज्याय् खँ यंकेत इनाप यायेगु नाप नापं थःपिनिगु भावनयात बेवास्ता यात धाःसा विद्रोह यायेगु धकाः तप्यंक हे ख्याच्वः बियादीगु खः । थ्व हे दथुइ जातीय पहिचान सहितया जातीय स्वायत्त प्रदेशतय्गु सुनिश्चितता यायेमाःगु नाप नापं न्हूगु संविधान निर्माण यायेमाःगु नापं १६ गू सूत्रीय माग तयाः आदिवासी जनजाति संयुक्त संघर्ष समितिया आह्वानय् आदिवासी जनजातिय्सं कन्हय् संविधानसभा न्ह्यःने धर्ना च्वनीगु जूगु दु । सरकारं संविधानसभा जःखः निषेधित क्षेत्र धकाः म्हिगः मंगलवाः घोषणा याःगु जूसां नं गन तक वने जिउ अन तक वनाः मूल रुपं आदिवासी जनजातिया शक्ति प्रदर्शन यायेगु तयारी जुयाच्वंगु दु धकाः आदिवासी जनजाति संयुक्त संघर्ष समितिं धाःगु दु ।