फोरम विभाजनं न्हूगु तरंग

जयप्रकाशया सभासद्त धुलिखेल रिसार्टय्

येँ (सन्ध्या टाइम्स)/सरकारय् दुथ्याःगु मधेसी जनअधिकार फोरम म्हिगः विभाजन जुइवं देय्या राजनीतिइ हानं न्हूगु हे कथंया तरंग पिहां वःगु दु। फोरमया विभाजनं सरकारयाके दुगु दुई तिहाई समाप्त जुइवं संविधानसभा भंग हे जुइगु खः लाकि धइगु ग्याःचिकुं यानाः राजनीतिइ न्हूगु तरंग ब्वलंगु खः ।

थ्वहे झ्वलय् थौं युरोपियन युनियनया राजदूततय्सं नेपाली कांग्रेससा सभापति सुशील कोइराला नापलानाः खँल्हाबल्हा ब्याकूगु दु। युरोपियन युनियन संविधानसभा भंग याये मजिउनि धइगु पक्षय् दु। अथे हे थौं हे भारतया राजदूत राकेश सुदं नं कोइरालायात नाप लानाः खँ ल्हाःगु दु। भारत धाःसा संविधानसभा भंग यायेगु पक्षय् दुगु खँ सूत्रं धाःगु दु ।

उखे पार्टी विभाजन यानाः पिहां वःपिं मधेसी अनअधिकार फोरम (गणतान्त्रिक) या सभासद्तय्त धुलिखेलया छगू रिसोर्टय् तयेयंकूगु दु। अन संचाकर्मीलिसे न्ववासें उकिया नेता जयप्रकाश गुप्तां यदि संविधान सभाया म्याद थपे यायेगु खःसा प्रधानमन्त्रीया राजीनामा न्हापांगु सर्त जुइमाः धयादीगु दु ।

माओवादीया कन्हय्या आमसभा नं स्थगित
एकीकृत माओवादीं कन्हय् देय्न्यंकं शक्ति प्रदर्शन यायेगु कथं आयोजना यायेगु धकाः घोषणा यानातःगु सभाया ज्याझ्वः थौं आकाझाकां स्थगित याःगु दु। शान्ति व संविधानया नितिं जनपरिचालन यायेगु झ्वलय् देय्या मूमू शहरय् ततःधंगु जुलुस पिकयाः सभा यायेगु ज्याझ्वः तयातःगु खः। तर देशय् ब्वलंगु न्हूगु परिस्थितियात ध्यानय् तयाः माओवादीं उगु ज्याझ्वः स्थगित याःगु खः। माओवादी प्रवक्ता दिनानाथ शर्मां राष्ट्रिय राजनीतिइ गम्भीर परिस्थिति ब्वलंगुलिं आमसभा व मेमेगु ज्याझ्वः नापं स्थगित यानागु जानकारी बियादीगु दु। वय्कलं धयादिल, 'परिस्थिति गम्भीर जूगु दु। उकिं जिम्मेवार जुयाः न्ह्याः वनेमाःगु जुयाः आमसभा स्थगित यानागु खः।' माओवादीं उकन्हु तक जेठ १० गते जनपरिचालनया नामं सभा व जुलुस यायेगु धयातःगु खःसा लिपा मातृका यादवया माओवादी पार्टीं थौं नेपाल बन्द घोषणा याःगुलिं उगु ज्याझ्वःयात लिछ्यानाः कन्हय् जेठ ११ गते यायेगु तयारी याःगु खः। थौं वयाः उगु ज्याझ्वः नं स्थगित याःगु दु ।