राजनीतिक स्वार्थ व राष्ट्रिय स्वार्थ

कृष्ण प्रजापति

देश लोकतान्त्रिक गणतन्त्र स्थापित यायेगु लँय् न्ह्यानाच्वंगु दु। तर थनया नेता व राजनीतिक पार्टीत धाःसा पुलांगु हे व्यवस्थाय् तक्यनाच्वंगु अवस्था दु। निदँ दुने न्हूगु संविधान दयेके धकाः संविधानसभाय् वंपिं प्रतिनिधितय्सं निदँया दुने न्हूगु संविधान दयेके मफयेवं अन्तरिम संविधान हे संशोधन यानाः दच्छिया लागिं संविधानसभाया म्याद थप याःगु खःसा आः उगु दछि नं प्यन्हु हे जक ल्यं दनि। प्यन्हुया दुने संविधान जारी याइगु ग्यारेन्टी मदयेवं थीथी दवाव समूहतय्गु गतिविधि अप्वया वःगु दु। ई दतले प्रधानमन्त्री ल्ययेगु, गृहमन्त्री ल्ययेगु व सरकारय् वनाः ठेक्कापट्टा ल्हातय् लाकेगुनिसें गैरराजनीतिक ज्याय् जक राजनीतिक नेतातय् अप्वः ई वन। अथे जुयाः नं थःपिनि दलीय स्वार्थ वा राजनीतिक स्वार्थ त्वःताः राष्ट्रिय स्वार्थया लागिं ज्या यायेगु खःसा आः नं जनतां ई बीफु। मखुसा खालि थःपिनि सुख सुविधा अप्वयेकेगु लागिं हे जक संविधानसभाया म्याद हाकनं अप्वयेकेगु व जनतायात बी धाःगु न्हूगु संविधान बी मफइगु खत धाःसा उगु कमजोरीया लागिं राजनीतिक पार्टी व नेतातय्सं जनताया न्ह्यःने माफी मवँसे हे मगाये धुंकल ।

दलीय स्वार्थ, दल दुने जुयाच्वनीगु गुटबन्दी व थीथी राजनीतिक षडयन्त्रया कारणं हे २००७ सालय् प्राप्त जूगु प्रजातन्त्र झिदँ लिपा २०१७ सालय् वयाः अपहरण जूगु खः। थौं नं २०६२/६३ सालय् प्राप्त जूगु लोकतान्त्रिक गणतन्त्र यदि थथे हे अन्यौलपूर्ण अवस्था ताः ई जुयाः संस्थागत याये मफया वन धाःसा गन थ्यंकाः समाप्त जुइगु खः धाये फइ मखु। अथे जुयाः नं म्हिगः गणतन्त्र स्थापनाया इलय् स्वयां नं आः गणतन्त्रयात संस्थागत यायेगु ज्याय् राजनीतिक पार्टीतय् ध्यान वनेमाः।
राजनीतिक अधिकार संरक्षणया लागिं न्हूगु संविधान निर्माण यानाः उकी किटानीसाथ न्हूगु नेपाः सिर्जनाया आधारभूत चीजत समावेश यायेमाःगु खः। तर अथे न्हूगु संविधानयात पूवंकेगु लागिं वयाच्वंगु थीथी आगत चीजयात राज्य व्यवस्थां गुलि गहन रुपं ध्यान तयेमाःगु खः, अथे यानाच्वंगु खने मदु। राजनीतिक व्यवस्थाय् लोकतन्त्र वयेधुंकाः जनजीविकाया थीथी पक्षयात नं लोकतान्त्रिक याना वनेमाःगु खः। तर थन ला पुलांगु सामन्ती संस्कार आः नं अथे हे ल्यनाच्वंगु स्थिति दु। थुकिं न्हूगु नेपाः वये फइ मखु ।

यदि न्हूगु नेपाःया कल्पना साकार यायेगु खत धाःसा म्हिगः जनयुद्ध व लोकतन्त्र प्राप्त यायेत गुलि सक्रिय जुयाः जनता, देश व राजनीतिक पार्टीत छथाय् च्वनाः छगू हे ध्यान यानाः मेगु छुं छुं हे स्वार्थ मस्वसे जिउ ज्यान पानाः मेहनत याःगु खः, आः नं अथेहे चांन्हिं नेपाली जनताया आवश्यकता पूवंकेगु ज्याय् ध्यानपूर्वक लगे जुइमाःगु खः। तर थन ला थीथी दलया नेतात थःथःगु हे तालं थःपिनि स्वार्थ पूवंकेगु ज्याय् जक लगे जुयाच्वंगु खनेदु। थःपिनि स्वार्थय् छुं भचा च्वय् क्वय् लाइगु खने दयेवं हे दलबदल व न्हूगु दलया सिर्जना यायेगु व थः १ नम्बर नेता हे जुइगु गलत परिपाटी विकास जुजुं वनाच्वंगु दु। अथे जुयाः नं पीगू राजनीतिक दलं संविधानसभाया चुनावय् ब्वति कयाः नीन्यागू पार्टीं संविधानसभाय् थः सभासद्त छ्वयाः प्रतिनिधित्व याःगु खःसां आः वयाः नीच्यागू दलयात राजनीतिक पार्टीया हैसियत बीत सदन बाध्य जुयाच्वंगु दु। थ्व धइगु मिले जुइगु स्वयां नं विभाजन जुयाः शक्ति विकेन्द्रीकरण जूगु बांलाःगु दसु खः। देशया लागिं थ्व फाइदाजनक खँ धाःसा ख हे मखु ।

राजनीतिक स्वार्थ स्वयां राष्ट्रिय स्वार्थयात ध्यानय् तयाः राजनीतिक पार्टीतय्सं थःगु सिद्धान्त स्वयां न्हापां देशया भिं यायेगु ज्यायात प्राथमिकता क्रमय् तयेमाःगु खः। तर अथे जुइ फयाच्वंगु मदु। थन ला झी न्ह्यागु हे राजनीतिक पार्टीया कार्यकर्ता कथं जूसां न्हापां थःपिं निं तःधं जुइगु स्वभाव दुपिं जुयाः म्वानाच्वनागु दु। वास्तवय् देश व जनताया हीत यायेगु स्वयां राजनीतिक दलया स्वार्थ उलि तःधंगु स्वार्थ जुइ हे फइ मखु। राजनीतिक पार्टीतय्गु हे विचार, सिद्धान्त व गतिविधिया आधारय् देश चले यायेगु हे प्रजातान्त्रिक परिपाटी खः। तर आः तक नं छुं सीमित नेतातय्गु स्वार्थयात हे जक ध्यानय् तयाः राजनीतिक पार्टीयात बाइपास यानाः तकं सत्ता चले यायेगु व मन्त्रीमण्डल चले जुइगु कथंया स्वभाव विकास जुया वयाच्वंगु दु। नेता नीति स्वयां हावी जुइगु परिपाटी भिंगु चीज मखु। राष्ट्रिय स्वार्थयात तकं हाचांगायाः ज्या यायेगु परिपाटीं कन्हय् तःधंगु समस्या वइगु खँय् निगू मत दइ मखु। थौंया आवश्यकता छु खः धइगु स्वयां थः अप्वः ई तक गथे सत्ताय् टिके जुयाच्वनेफइ धइगु विचाः यायेगु भिंगु कल्पना मखु। थ्व घोर आपराधिक कल्पना जूगुलिं यदि राजनीतिक नेतातय्सं थुकथं राणा शासनकालय् थें स्वार्थ व गुटयात जक ध्यानय् तयाः मेपिंत वास्ता मयायेगु जुया वल धाःसा गुट उपगुटया कारणं हे उगु सत्ता छन्हु बांमलाक क्वःदःगु इतिहास हानं लिसा कायेफु ।

थौं राजनीतिक पार्टीया नेतातय् गतिविधि स्वयेगु इलय् थःपिनि मनय् गुट उपगुटया मानसिकता तयाः हे मेपिंत गुटबन्दी याये मजिउ धयाच्वंगु खनेदु। सत्तारुढ एमाले, सत्ता साझेदारी दल माओवादी व स्वयम प्रतिपक्षीइ लानाच्वंगु नेपाली कांग्रेस दुने नं अलग्ग अलग्ग नेताया अलग्ग अलग्ग धारणं थ्व खँ स्पष्ट जुजुं वनाच्वंगु दु। गुट उपगुटया राजनीतिं देश भिंकिगु स्वयां स्यंकेगु हे यानाच्वंगु दु। नापं प्रजातन्त्र स्यनावंगु नं थज्याःगु हे कारणं खः। म्हिगः नेपाली कांग्रेस दुने गिरिजा गुट व शेरबहादुर गुट अलग्ग जूगु कारणं उगु राजनीतिक पार्टीयात जक मखु कि देशयात हे तःधंगु नोक्सान जुल। आः नं सत्ताय् च्वनाच्वंगु एमालेया नेतातय् दथुइ नं झलनाथ गुट, माधव नेपाल व केपी ओलीया गुट धकाः अलग अलग जुइगु अले माओवादी थेंज्याःगु जनयुद्ध याना वःगु राजनीतिक पार्टी दुने नं छगू गुटं मेगु गुटया मनूयात कारवाही हे यायेगु वा नेताया ज्यान तकं कायेगु धम्की जुयाच्वंगु चर्चा जुयाच्वंगु धइगु देश न्ह्यज्याकेगु स्वयां नं थःपिनि राजनीतिक स्वार्थ पूवंकेगु निंतिं जक ज्या जुयाच्वंगु खनेदु। अथे जुयाः नं राजनीतिक स्वार्थ स्वयां नं देशया विकास निर्माणय् ध्यान तयेगु खःसा राजनीतिक स्वार्थ स्वयां नं राष्ट्रिय स्वार्थयात ध्यानय् तयाः हे फुक्कं दल छथाय् च्वनाः ज्या याना वनेमाः ।

More Stories Like this