मधसी फोरमया गणितीय विभाजन

संविधानसभाया म्याद थपे यायेगु लागिं सरकारं दुई तिहाई खाकेगु कुतः यानाच्वंगु इलय् लाक्क सरकारय् दुथ्याःगु मधेसी जनअधिकार फोरम कुचा जूगु दु। उपेन्द्र यादवया अध्यक्षताय् न्ह्यानाच्वंगु उगु पार्टी उकिया हे सहअध्यक्ष जयप्रकाश गुप्ताया नेतृत्वय् कुचा जुयाः वंगु खः। फोरमयाके दुपिं २३ म्ह सभासद् मध्ये १३ म्ह सभासद् ज्वनाः गुप्तां मेगु हे पार्टी चायेकूगुलिं सरकारयाके आः दुई तिहाईया बहुमत मदया बिउगु दु। थ्व ल्याखं स्वयेगु खःसा मधेसी जनअधिकार फोरमय् थुपालय् जूगु विभाजन अतिकं हाथ्यापूर्ण व 'क्यालकुलेटिभ' जूगु खनेदु। सरकारं संविधानसभाया म्याद थपे यायेगु प्रस्तावयात दुई तिहाई बहुमत हयाः जूसां पारित याये धकाः यानाच्वंगु कुतःयात विपक्षी नेपाली कांग्रेसं गुगु हाथ्या बियाच्वंगु खः, व वास्तवय् अथें मखु धइगु खँ थ्व विभाजनं प्रस्ट याना बिउगु दु ।

फोरमया थ्व विभाजनं यानाः आः संविधानसभाया म्याद दछि थपे यायेगु धकाः वयाच्वंगु प्रस्तावया भविष्य छु जुइगु खः सुनां नं धाये मफुगु अवस्थाय् थ्यं वंगु दु। यदि संविधानसभाया म्याद धाथें थपे यायेगु खःसा आः नेपाली कांग्रेसं न्ह्यःने हयाच्वंगु सर्तयात न्हासं चुयाः नं स्वीकार यायेत सरकार बाध्य जूगु दु। थ्व प्रस्तावयात दुई तिहाई बहुमतं जूसां पारित याये फइ धइगु आत्मविश्वास ज्वनाः हे सरकारं सुयाकें सल्लाह मयासे उगु प्रस्ताव दर्ता याःगु खः। तर फोरमया विभाजनं सरकारया उगु आत्मविश्वास चकनाचुर जूगु दु। थ्व विभाजनं सरकार ला विघटन याइ मखु तर संविधानसभा विघटन याइगु सम्भावना धाःसा प्रवल दु ।

More Stories Like this