सचिवालयसं माःगु जनशक्ति याकनं भर्ना यायेगु निर्णय

येँ (झीगु स्वनिगः)

माओवादी जनसेनाया रेखदेख, पुनःस्थापना लिसे समायोजन विशेष समितिया सोमवाः च्वंगु बैठकं समिति मातहतया सचिवालयसं माःगु जनशक्ति याकनं भर्ना यायेगु निर्णय याःगु दु । जनसेेनाया रेखदेख लिसे अनुगमन लगायतया ज्याय् छ्वयेमाःपिं प्यसः व स्वीस्वम्ह याकनं स्वयाः याकनं भर्ना यायेगु निर्णय जूगु सरकारया मू छ्याञ्जे लिसे समितिया छ्याञ्जे माधवप्रसाद घिमिरें जानकारी बियादीगु खः । सचिवालय मातहत सिच्युएसन सेन्टर नीस्वनेगु व उकिं फुक्क शिविरया नीप्यघौ निगरानी यायेगु समितिं निर्णय याःगु दु । सेन्टरय् सरकारया स्वंगुलिं सुरक्षा निकायपाखें प्यम्ह/प्यम्ह लिसे जनसेनापाखें प्यम्ह यानाः झिंखुम्ह दइ । शिविर व्यवस्थापन ज्याकुथिइ माःगु जनशक्ति नं याकनं हे पदपूर्ति यायेगु सहमति जूगु दु ।

माओवादी स्थायी समिति दुजः वर्षमान पुन अनन्तं सोमवाःया बैठकपाखें शान्ति प्रक्रियाया नितिं धिसिलाःगु लकस दयेकेगु धयादीगु दु । वय्कलं सेना समायोजनया मोडालिटी व कार्ययोजनाया बारे शीर्ष तहलय् सहलह याइगु नापं जानकारी बियादीगु दु । कांग्रेस नेता रामशरण महतं शान्ति प्रक्रियाया विषयसं थःपिंसं ल्ह्वनाः वयाच्वंगु झिगू बुँदे शर्त बैठकय् तःगु न्ह्यःथनादीगु खः । सेना समायोजनया मोडालिटी व कार्ययोजनाया विषयसं पिनेहे सहलह यानाः लिपांगु क्वःछीना समितिपाखें क्वःछीमाःगु वय्कःया धापू खः ।