नेपाःया जलविद्युतय् लगानी यायेगु रुसया इच्छा

रुस (एजेन्सी)

नेपाःया तःधंगु जलविद्युत आयोजनाय् लगानी यायेगु रुस व अनया निजी क्षेत्रं च्यूताः क्यंगु दु । सम्भाव्यता अध्ययन जुइधुंकूगु निसः व पीगू मेगावाट स्वयाः आपालं क्षमता दुगु विद्युत आयोजनाया प्रस्तावलिसे राजधानी मस्कोय् वार्ताया नितिं वयेत उमिसं सरकारयात इनाप याःगु दु । नेपाःया जलविद्युतय् लगानी यायेत इच्छुक रुसी कम्पनीइ ग्याजप्रोम व रुसल खः । ग्याजप्रोम विश्वन्यंक चिकं लिसे ग्यास निर्यात यायेत रुसया दकले तःधंगु कम्पनी खः । सन् २००८ य् जक ग्याजप्रोमं न्यासः व पीगुंगू अर्ब क्युबिक मिटर प्राकृतिक ग्यास व स्वंगू करोड नीगू लख टन चिकं उत्पादन याःगु खः, गुगु विश्वय् उत्पादन जुइगु कूल ग्यास उत्पादनया झिंन्यह्गू प्रतिशत खः । रुसल विश्वया दकले तःधंगु आल्मुनियम कम्पनी खः ।

विश्वय् उत्पादन जुइगु कूल आल्मुनियम मध्ये झिंस्वंगू प्रतिशत रुसलं कःघानातःगु दु । तःधंगु आयोजनाय् लगानी यायेत तयार दुगु धासें उगु कम्पनीं मस्कोस्थित नेपाली दूतावासपाखें सरकारयात असार १५ गते वार्ताया नितिं ब्वनापौ छ्वयाः हःगु खः । थ्वहे ब्वनापौ ज्वनाः रुसया नितिं नेपाली राजदूत सूर्यकिरण गुरुङ थौंकन्हय् येँय् झाःगु दु । रुस व अनया निजी क्षेत्रं छ्वयाः हःगु ब्वनापौ बारे राष्ट्रपति डा. रामवरण यादव, प्रधानमन्त्री झलनाथ खनाल, उपप्रधान लिसे अर्थमन्त्री भरतमोहन अधिकारी, ऊर्जामन्त्री गोकर्ण विष्टयात नापलानाः जानकारी बिइधुंकूगु वय्कलं धयादीगु खः ।

More Stories Like this