माथिल्लो कर्णालीइ मिं नल

सुर्खेत (झीगु स्वनिगः)

स्थानीय बासिन्दां आइतबाः न्हिनय् दैलेखया पाल्तडास्थित भारतीय निर्माण कम्पनी जिएमआरया स्वंगू भवनय् मि तयाः बिइगुया लिसलिसे कर्मचारीत दथुइ ल्हाः नापं वागु दु । जिएमआर माथिल्लो कणर्ाली जलविद्युत परियोजनाया निर्माण जिम्मा काःगु कम्पनी खः । कम्पनीया सुर्खेतस्थित सम्पर्क ज्याकूया कथं अज्ञात समूहं न्हिनय् प्यताः इलय् निर्माणस्थलय् दुगु ज्याकुथिइ दुहां वनाः मि तयाः ब्यूगु जानकारी ब्यूगु खः । उमिगु आक्रमणपाखें ज्याकूया सुरक्षा गार्ड नरबहादुर बोहोरा व मजदुर तोया बिष्ट घाःपाः जूगु ज्याकूया सह - प्रबन्धक प्रदीप नेपालं जानकारी बियादीगु खः । निर्माणस्थलय् दुगु सामाजिक अधिकृत राजन रजवारया लिसलिसे मेमेपिं कर्मचारीपिं भक्तराज जोशी, कुवददी श्रीवास्तव, मातृका खनाल लगायत च्याम्ह मनूत स्वापू विहीन दुगु नापं सह - प्रबन्धक नेपालं जानकारी बियादीगु खः ।

'घाःपाः जूपिनिगु उद्दारया नितिं थनपाखें एम्बुलेन्स छ्वयाःगु दु, तर घटनालिपा सुंलिसे नं स्वापू तयेत ताःलाःगु धाःसा मदुनि' - वय्कलं धयादिल । मिं नयाः अन दुगु ल्याब, ज्याकू व आवास भवन ध्वस्त जूगु कम्पनीं जानकारी ब्यूगु खः । निर्माणय् छ्यलीगु मूल्यवान सामानत नं नष्ट जूगु कम्पनीया धापू दु । जग्गाया मू - आब्जा सम्बन्धी विवादय् मि तःगु व आक्रमण याःगु जानकारी ब्यूसां नं उकिया पुष्टि धाःसा जूगु मदुनि । सह - प्रबन्धक नेपालं लिपांगु इलय् स्थानीयबासीपाखें अज्याःगु छु नं माग मवःगु जानकारी ब्यूगु खः ।

More Stories Like this