लुँया माग निरन्तर च्वयेपाखे

लण्डन (एजेन्सी)

विश्वय् लुँया माग सन् २०११ या न्हापांगु स्वलाय् अझ नं उच्च जूगु दु । सन् २०१० या अन्त्यपाखें अन्तर्राष्ट्रिय बजारय् लुँया माग यक्व मात्राय् अप्वःगु अवस्थाय् जूसां नं थुगु दँ नं लुँया माग उच्च जुइगु धुकुमाः वल्र्ड गोल्ड काउन्सिलं याःगु दु । सन् २०१० या न्हापांगु स्वलाया तुलनाय् सन् २०११ या न्हापांगु स्वलाय् अन्तर्राष्ट्रिय बजारय् लुँया माग थ्यंमथ्यं नीखुगू प्रतिशतं उच्च जुयाः करिब ३१०.५ टन दुगु धाःगु खः । लुँया माग उच्च दुगु सन् २०१० या लिपांगु स्वलाया तुलनाय् धाःसा सन् २०११ या न्हापांगु स्वलाय् करिब न्यागू प्रतिशतं मागय् कमी वःगु वल्र्ड गोल्ड काउन्सिलं धाःगु दु ।
अन्तर्राष्ट्रिय बजारय् भारत लगायत विश्वया उदायमान अर्थतन्त्र दुगु देशय् लुँया माग उच्च जुयाः वयाच्वंगु अवस्थाय् युरोपय् गुलिखय् देशय् सन् २०१० या निगूगु स्वलाया इलय् खनेदुगु ऋण सङ्कटया अवस्थां लुँया माग अझ उच्च जूगुलिं भावय् सुधार वःगु खः ।

अन्तराष्ट्रिय बजारय् लुँया मागय् वःगु बढोत्तरीया कारण वंगु झिंच्यालाय् लुँया भावय् प्रतिऔंस करिब द्वःछि व न्यासः अमेरिकी डलरं अप्वःगु तथ्याङ्कपाखें क्यंगु दु । विश्व बजारय् आर्थिक मन्दीया कारण सङ्कट वःगु कारणं नं आर्थिक सुरक्षाया प्रत्याभूतिया नितिं लुँ तसकं भरपर्दो लगानी जूगु दाबी यानाः लुँइ लगानी अप्वयेकेवं भावय् नं थहांवंगु खः । सन् २०१० या अपि्रलनिसें जुन महिनातक्कया अन्तर्राष्ट्रिय बजारय् लुँइ लगानी यायेगु नितिं ५७२ टन लुँया माग वःगु जानकारी ब्यूगु खः । सन् २०११ या निगूगु स्वलाय् नं अन्तर्राष्ट्रिय बजारय् लुँया माग करिब ३०० टन दइगु धुकुमाः याःगु दु । भारत - चीन लगायतया देय्या वैदेशिक मुद्रा संचिती तसकं बल्लाःगु कारण अनया केन्द्रीय बैङ्कं लुँया मौज्दात थकायेगु नितिं नं तःधंगु ल्याखय् लुँ न्याःगुलिं नं लुँया माग वृद्धि जूगु दु । अथेहे भारत थेंज्याःगु देशय् लुँ तिसाया माग विशेष यानाः नखः चखः व ईहिपाः लिसे मेमेगु संस्कारया नितिं तःधंगु ल्याखय् माग अप्वयाः वयाच्वंगुलिं नं अन्तर्राष्ट्रिय बजारय् लुँया मागय् थहां वनेत ग्वाहालि जूवंगु दु ।

More Stories Like this