विना कारण वन्द

खसतय्गु क्षत्री संयुक्त राष्ट्रिय आन्दोलन परिचालन समितिं थीथी माग तयाः याःगु स्वनिगः वन्द लित काःगु दु । थुया न्ह्यः खसतय्गुहे क्षत्री समाजं आइतवाः याःगु स्वनिगः वन्दं पिनेपिने पस व यातायात फुक्क वन्द जूसां न्हूसतक छगू त्वःताः अप्वः पसःत चाःगुहे खनेदु । थुगुकथं स्वये वन्द ताःमलाःगुहे धायेमाः । रातारात दयेकूगु खसतय्गु थीथी समूहतय्त स्वनिगयात नेवाःतय्सं उलि मू व महत्व व्यूगु खनेमन्त ।
शान्ति व पुननिर्माण मन्त्रालयय् सरकारी प्रतिनिधि व समितिया प्रतिनिधितय्गु दथ्वी जूगु खँल्हा बल्हा लिपा सोमवाःया स्वनिगः वन्द लित काःगु खः । वन्दकर्ता खस क्षेत्र समाजया माग यात कयाः सरकारं सकारात्मकरुप आश्वासन वीवं वन्द लित काःगु खः । सरकारं तत्काल पूवंके फैगु मागयात त्वःताः ल्यं मागया वारे लच्छिलिपा कार्यदल दयेकाः पूवंकेगु बचं वीवं वन्दकर्तात आस्वस्त जूगु खः । देय् शान्ति व संविधान दयेकेगु जटिल मोडय् थ्यनाच्वंगु इलय् छुंन माग यायेगु उपयुक्त मखु । छुं माग दःसा कि न्हापाहे यायेमाः कित छुं ई लिपा यायेमाःगु खः । संविधान सभाया अवधि छुं न्हि जक ल्यं दनिवलय् वन्द हडतालय् कुहां वयाः छुंनं न्हूगु माग यायेगु गलत खः ।

खस क्षत्रीतय्सं थःपिं आदिवासी जूगुलि आदिवासी धलखय् सूचुकित यासे थःपिनिगु आरक्षण जुइमाःगु नं धाःगु दु । स्वनिगःया भूमिइ च्वनाः खस क्षत्रीतय्सं आदिवासीया दावी यायेगु गलत खः । थःपिनिगु भूभाग कणर्ाली अञ्चल अर्थात खसाङ्ग त्वःताः करपिनिगु भूमिइ वयाः च्वनेगु अले उकियाहे आधारय् थःपिन्त आदिवासी धायेमाः धायेगु अनुचित खः । थःपिनिगु भूमि खसाङ्गय् वनाः थ्व दावा यायेफै, तर नेवाः प्रदेश दुने च्वनाः थःपिन्त आदिवासी धायेमाः धायेगु गलत खः । नेपाल सरकारं नं लच्छि लिपा कार्यदल दयेकाः इमिगु मागयात सम्वोधन यायेगु धयाः आदिवासीया अर्थप्रति ध्यान मव्यूगु खनेदु । थनया आदिवासीहे मखुपिन्त आदिवासी शब्दयात गलत अर्थ व तात्पर्य वीत स्वयेमज्यू । थःपिन्त आदिवासी धायेमाःगुया लिस लिसें, आरक्षणया व्यवस्था जुइमाःगु, खसान राज्य कायम यायेमाःगु व न्हूगु संविधान दयेकेमाःगुया लिसें जातीय राज्यया विरोध यायेत स्वःगु दु । थ्व विरोध अनावश्यक खः । संघीयता विरोधीतय्गु जालय् थुपिं तक्यंगु स्पष्ट दु ।

नेवाः स्वायत्त राज्य दुने वयाः याःगु वन्दप्रति नेवाःतय्सं तामाशा जक स्वःगु आभाष जूगु दु । थ्व खँयात कयाः नेवाः स्वायत्त राज्यया हिमायतीतय्सं विरोध यायेमाःगु खः । तर व्यवहारय् अथ्य मजुल । छु नेवाः स्वायत्त राज्य दुने वन्द, हडताल वा छुंनं ज्याझ्वः विशेष यानाः संघीयता विारेधी छुंनं ज्याझ्वः याके मवीमाःगु खः । थौं खसत वयाः जातीयताया आधारय् प्रदेश दयेके मज्यू धाल, कन्हे मेमेपिं नेवाः लागा दुने वयाः नेवाः विरोधी ज्याझ्वःत याः वइ । थ्व गलत खः । जातीय राज्य विरोधीतय्त ला अनहे याकेमज्यू । थ्व परम्परा व सोचयात नेवाःतय्सं त्वाथले फयेमाः । मखुसा नेवाःतय्गु नेवाः स्वायत्त राज्य मखु कांग्रेसं धाःथे राजधानी प्रदेश यानां त्वःती । नेवाःत गम्भीर जुइहे माः थ्व खँय् । विना कारण वन्द याये मज्यू । उकिया प्रतिरोध नेवाःतय्सं यायेहेमाः ।

More Stories Like this