नेपालभाषाया कार्यकर्ता नरेश कुमार शाक्य मन्त

येँ (झीगु स्वनिगः)

नेपालभाषाया कार्यकर्ता नरेश कुमार शाक्य म्हिगः सोमवाः मन्त । ४० दँ दुम्ह वय्कः शाक्य ता ई न्ह्यःनिसें जलासेँया ल्वचं कयाच्वंम्ह खः । शाक्य म्हिगः वीर अस्पतालय् मदुगु खःसा म्हिगः हे पशुपतिया आर्यघाटय् सिथं यंकेगु ज्या जूगु खः । वीर अस्पतालय् सुथय् साढे १० बजे यंकूगु खःसा ११ बजे हे मदुगु खः । नरेश वंगु आइतवाः जक उगु अस्पतालय् डायलासिस याकाः लिहां वःगु खः ।
वय्कःयात आर्थिक ग्वहालि यायेगु नितिं नेपालभाषा ख्यलं छुं ई न्ह्यःनिसें थीथी कथंया ज्याझ्वः यानाः वयाच्वंगु खः । मदुम्ह शाक्य नेपालभाषा ख्यालय् तसकं सक्रिय जुयाः ज्या यानाच्वनादीम्ह नाप नापं पत्रिका छापेयाइगु प्रेसयात थःगु लजगाः कथं लिपांगु इलय् ज्या यानाः वयाच्वंगु खः ।
मदुम्ह नरेश कुमार शाक्यया मांलिसें कलाः व ११ दँ दुम्ह काय् छम्ह नं दु ।