'शान्ति व संविधान विरोधीतय्सं पार्टी तछ्यात’

येँ (झीगु स्वनिगः)

मधेसी जनअधिकार फोरमं संविधानसभा व शान्तिया विरोधी शक्तितय्सं पार्टी तछ्यात धकाः धाःगु दु । पार्टी तज्याःगु दिं म्हिगः सोमवाः हे सिंहदरवारया संसदीय दलया ज्याकुथिइ च्वंगु फोरमया मुँज्यां सह अध्यक्ष जयप्रकास प्रसाद गुप्ता षडयन्त्रया नाइके जूगु ठहर याःगु दु । मुँज्या लिपा फोरमया नायः उपेन्द्र यादवं धयादिल 'संविधानसभा विघटन यायेत कुतः यानाच्वंपिं, शान्ति प्रक्रियाया चाहाना मदुपिं व मधेस विरोधीतय्सं पार्टी तछ्याःगु खः उकिया नाईके जेपी गुप्ता हे खः ।' दुई तिहाई बहुमतं जूसां संविधानसभाया म्याद थप यायेगु निश्चित जुइवं उकियात असफल यायेत पार्टी तछ्याःगु खः धकाः द्वपं बियादीगु दु । फोरम तज्याःगुलिं शान्ति व संविधान निर्माणया ज्याय् गम्भीर लिच्वः लायेफु धकाः वय्कलं धयादिल ।

मधेसी जनअधिकार फोरमया सह अध्यक्ष जयप्रकास गुप्तां पार्टी तछ्याःगु खः । वय्कलं न्हूगु पार्टीया नां मधेसी जनअधिकार फोरम -गणतान्त्रिक) धकाः तःगु दु । गुप्ताया पक्षय् १३ म्ह सभासद्त दुथ्याकूगु दु । वय्कलं थः नापं १३ म्ह सभासद्या ल्हाःचिं कयाः म्हिगः सोमवाः सभामुख सुवासचन्द्र नेम्वाङयात थःपिन्सं न्हूगु पार्टी चायेकागु जुल धकाः जानकारी बियादीगु दु । वय्कः गुप्ता नापं सांसद्पिं विश्वनाथ प्रसाद यादव, अक्वाल अहमत साह, राजवल यादव, नन्दन कुमार दत्त, सवितादेवी यादव, राजकिशोर यादव, सुरिता कुमारी साह, सल्मा खातुन मिकरानी, आत्मराम प्रसाद साह, ओमप्रकाश यादव, चन्द्रीका प्रसाद यादव व सन्ध्या देवी दुथ्याःगु दु । फोरमया मुक्कं यानाः २५ म्ह सांसद्त दुगु खःसा आः न्हू चायेकूगु फोरम गणतान्त्रिकय् मुक्कं यानाः १३ म्ह सांसद्त दुथ्याःगु दुसा आः मधेसी जनअधिकार फोरमया नायः उपेन्द्र यादवया पक्षय् धाःसा मुक्कं यानाः १२ म्ह जक सांसद्त ल्यंदनि ।

विश्वनाथ प्रसाद यादव कुटनीतिक पासपोर्ट काण्डय् निलम्वनय् लाःम्ह खःसा नन्दकुमार दत्तयात कृषी राज्यमन्त्री धकाः घोषणा यानाः नं सपथ ग्रहण मयाम्ह खः । अथे हे चन्द्रीका प्रसाद फोरमाया प्रमुख सचेतक खःसा सन्ध्यादेवी संसदया महिला वालवालिका तथा समाजकल्याण समितिया सभापति खः । थ्व हे दथुइ गुप्तां थःगु हे नेतृत्वय् १४ म्ह दुजः दुगु तदर्थ समिति तकं दयेकूगु दु । गुप्ताया नेतृत्वय् दयेकूगु फोरम गणतान्त्रिकया सह अध्यक्षय् राजकिशोर यादव, महासचिवय् आत्मराम प्रसाद साह, सह महासचिवय् अकवाल अहमद साह, सचिवय् सन्ध्यादेवी, कोषाध्यक्षय् सुरिता कुमारी साह व दुजलय् राजलाल यादव चन्द्रीका प्रसाद यादवपिं च्वनादीगु दु ।