जनजातितपाखें स्वंगू पार्टीया ज्याकुथिइ धर्ना

येँ (झीगु स्वनिगः)

आदिवासी जनजाति संयुक्त संघर्ष समितिया ग्वसालय् म्हिगः सोमबाः एकीकृत माओवादी, नेपाली कांग्रेस व नेकपा एमालेया केन्द्रीय ज्याकुथिइ संविधान सभां आदिवासी जनजाति मैत्री संविधान जारी यायेमाःगु माग यासें धर्ना बिइगु ज्या जुल । छगू हे इलय् छक्वलं च्वंगु धर्नाय् सम्बन्धित पार्टीया जनजाति नेतातय्सं हे नेतृत्व यानाः धर्ना व ज्ञापन पौ लल्हायेगु ज्या जूगु खः । आदिवासी जनजातिपाखें १६ बुदे माग न्ह्यथनातःगु ज्ञापन पतिइ संबैधानिक समितिया विवाद समाधान उपसमितिइ सहमति जूगु नेपाःया न्हूगु संविधानया नां नेपाःया सबिधान धका न्ह्यथंगुलिं तसकं आपति प्वंकुसें संघीय गणतन्त्र नेपाःया संबिधान धका च्वयेमाःगु माग यानातःगु दु लिसें राज्य पुनरसंरचना आयोग दयेकेत्यंगुयात नं बिरोध यानातःगु दु । एकीकृत माओवादीया ज्याकुथिइ च्वंगु धर्नाय् ज्ञापन पौ लल्हानाकासें पार्टी छ्याञ्जे सि पि गजुरेलं संघीयता व राज्यपुनरसंरचनाया मागयात संबोधन मयाइगु संबिधान एकीकृत माओवादी गुगु नं हालतय् स्वीकार मयाइगु धयादिल ।