चिचीधंगु दलतय्त कांग्रेसं हेकल
कांग्रेसया योजनाय् १७ दल
येँ (झीगु स्वनिगः)
अन्ततः प्रमुख प्रतिपक्ष दल नेपाली कांग्रेसं थःगु योजना कथं हे चिचीधंगु दलयात यंकेगु ज्या न्ह्याकूगु दु । एकीकृत माओवादीयात न्ह्यागु नं हालतय् कमजोर यायेगु नापं माओवादी व एमालेया दथुइ जूगु न्हय्गू बुँदाया सहमतियात त्वाः थलेगु योजना दयेकाः वनाच्वंगु कांग्रेसया उगु अभियानय् पुलांपिं जुजुवादीतय्गु पार्टीनिसें मधेसवादी स्वंगू दलया नेतात तकं तयार जूगु दु । तराई मधेस लोकतान्त्रिक पार्टी, तराई मधेस लोकतान्त्रिक पार्टी नेपाल, सद्भावना पार्टी, मधेसी जनअधिकार फोरम लोकतान्त्रिक, नेकपा -माले), राष्ट्रिय जनशक्ति पार्टी, राष्ट्रिय प्रजातन्त्र पार्टी, चुरे भावर एकता पार्टी, राष्ट्रिय जनमोर्चा पार्टी व राष्ट्रिय प्रजातन्त्र पार्टी, नेपाल जनता दल नापं स्वतन्त्र सभासदयात नं नेपाली कांग्रेसया नेतातय्सं हेकूगु दु ।
कांग्रेसं वर्तमान सरकार व एकीकृत नेकपा -माओवादी)यात ज्यामछिंकेगु नितिं अथे चिचीधंगु दलतय्त हेकेगु ज्या याःगु खः । विशेष यानाः कांग्रेसं संविधानसभाया म्याद थप याये न्ह्यः लडाकुया ल्वाभः राज्ययात लःल्हायेमाःगु, प्रधानमन्त्री झलनाथ खनालं राजीनामा बिइमाःगु नापं झिगू सर्त तःगु खः । व हे कांग्रेसया सर्तयात गबले तक स्वीकार याइमखु अबले तक संविधानसभाया म्याद थप मयायेगु धकाः तकं चिचीधंगु दलया नेतात सहमति जूगु खः । कांग्रेसं मधेसवादी दल, पुलांपिं जुजुवादी पार्टी नापं कांग्रेस नाप लिक्क लानाः वयाच्वंगु दलतय्त नं थःपिनिगु पक्षय् हःगु धैगु गनं लोकतन्त्रवादीया नामय् दलतय्गु ध्रुविकरण यानाः प्रगतिशिल दलतय्त ज्यामछिंकेत्यंगु जकं मखुला धकाः मनूतय्सं न्ह्यसः थनाहःगु दु ।
