व ई / थ्व ई

सुदन खुसः

अब्ले अब्ले
गब्ले
भुतू च्याः/मच्याः
भौप्वालं
कुं वः/मवः
जा नः/मनः
च्यूताः कयाः लाय्कुलिं
आत्मियतां मिखा ब्वइगु खः
जनताया छेंखा छेंखाः पतिकं ।

थौ थ्व इलय्
पित्याः व प्याःचाःगु मिखां खनाच्वन
व हे परम्परा व संस्कारया विभूषित शब्दं
थः म्वायेगुया ल्यनाच्वंगु छगू हे जक ज्याः थें
थः दनाच्वंगु जमीनया छगू हे जक दयित्व थें
थःगु हे भजन किर्तनया कासाय्
तक्मा लुटान यानाः
न्ह्यइपुक न्हि छ्याना च्वन
निरोया अनुकरण याना थें च्वंक
नेपाली संस्करण खः थें च्वक ।
पःखालं पिने खनीभनं /ताइभनं
छेंखापतिकं तुपः दिकाः
सिसिककः यानाः मुंकातःगु धुकुतिइ
ताःफ्वः हे तछ्यानाः
निषेध आज्ञाया धलः न्यंकाः न्यंकाः
जिगु आकाश वानाच्वंगु तिंख्यलय्
बुटया सलय् प्याखं ल्हुयाः ल्हुयाः
परेड म्हिताच्वन छूं हे मखुथें च्वंक न्हिलाः न्हिलाः

परम्परा व संस्कारया पूज्य शब्द दुने
स्वानाच्वंगु वर्तमान ब्वनाः जक सिल ।
पित्याः प्वाथय् जनी चिनाः
वयान लहिइगु सोंख
शायद आश्र्चय मध्येया आश्र्चय जुयाब्यूगु दु
जिगु देय् थौंकन्हय्

जन्म काःछि सिनाः सिनाः नं मदइगु हैसियतयात म्वाय्चुइके
थे
प्वाथं निसें भत्ताया हकदारत लहिनाः
मययेक, मछिंक घाकातःगु गलः थें
थौ जितः झं झं भ्यातुया वयाच्वंगु
कपाय् सवें याउँगु तौलयात
झं झं तुपतं भ्यातुकाः
देय् सिवें थःपाखे क्वसाये ताल्जुपाः ज्वनाः
ज्यू- मज्यूया शब्दकोषं अथं हिलाः हिलाः
जनता सेवाया नामं माकुक्क नयेगु मेवा भाःपियाहःगु दु
उकिं थाकु मुंकातयागु छकूचा तिंख्यःनं आस्था व विश्वासया
धरहराया किचलं थीभनं
ततःजाःगु पःखा दनाः पनेत स्वयाच्वंगु दु
म्हीग लायातःगु आत्मीयताय् नं क्ररतां भुनाहःगु दु ।
वस ! थ्व इलय्
परम्पराया पूज्य शब्दं न्हुयातःगु छ्यं
छक्वः जक नं संके मफूसा
दास व लासया संग्रहालय जुइ थ्व देय्
थ्व अवश्य खः ।

देय् सिवें थःत भ्यातु तयेकेगु
मात्र इमूचिया पपू दयावःगुया छुमां खः
इमूचा आक्सय् मखु
थःगु हे इतिहासं तनेत स्वयाच्वंगु खः ।

इमूचा शान्त बखुं जुयाः मखु
इमा जुयाः आतंक न्यंकेत स्वयाच्वंगु खः
मात्र झीगु छ्यं छक्वः जकसां संगु जुइमाः
शब्दकोषं पूज्या शब्द तना मवंसे मगाः
मात्र झीगु ल्हाःपा छक्वलं दनेमाः
मात्र झीगु सः छक्वलं न्ह्यायेमाः
बस ! अन वंश वंशया ल्याःचाः
झीगु न्हाय्पनय् मथ्वसें मगाः
खः अन वंश ध्वंसया कालिगढतय् ख्वाःपाः नं
झीगु मिखाया न्ह्यःने क्वमछुसें मगाः
थ्व अवश्य खः ।

More Stories Like this