मधेसी मोर्चा, राप्रपा, राजपा कांग्रेसया प्रस्तावय् सहमत
येँ (सन्ध्या टाइम्स)/प्रमुख प्रतिपक्षी दल नेपाली कांग्रेसपाखें संविधानसभाया म्याद थप यायेगु नितिं न्ह्यब्वःगु १० बुँदाया प्रस्तावयात मधेसी मोर्चाय् दुथ्याःगु स्वंगू मधेसवादी दल, राष्ट्रिय प्रजातन्त्र पार्टी, राष्ट्रिय जनशक्ति पार्टी व नेपाली जनता दल नापं मेमेगु चिचीधंगु दलतय्सं समर्थन याःगु दु। थौं सुथय् सिंहदरवारय् च्वंगु कांग्रेस संसदीय दलया ज्याकुथी च्वंगु मुँज्याय् थुपिं चिचीधंगु दलत कांग्रेसया एजेण्डाय् सहमत जूगु खः। कांग्रेसं न्ह्यब्वःगु १० बुँदाया सर्त कार्यान्वयन मयायेकं संविधानसभाया म्याद थप मयायेगु नापं व्यवस्थापिका संसदया बैठक तकं न्ह्याके मबीगु खँय् नं थ्व सहमति जूगु दु ।
बैठकय् कांग्रेसया नेतातय्सं संविधानसभाया म्याद थप यायेगु निंतिं माओवादीया सेना समायोजनया यायेगु झ्वलय् ल्वाभः राज्ययात लः ल्हायेगु ज्या मजुल धाःसा संविधान निर्माण याये फइ मखु धकाः मेमेगु दलया नेतातय्त थुइकेगु नापं थःपिनि प्रस्तावयात स्वीकार यानाः नापं वनेत इनाप यानादीगु खः ।
कांग्रेसं संविधानसभाया म्याद थपया नितिं जेठ १० गते न्ह्यः हे माओवादी सेनाया लडाकुया ल्वाभः राज्ययात लःल्हायेमाःगु नापं प्रधानमन्त्री झलनाथ खनालं जेठ १४ गते न्ह्यः हे राजीनामा बीमाःगु अडान तयाच्वंगु दु।
१० बुँदाया सर्त व्यवस्थापिका संसदय् ब्वनाः न्यंके दयेमाः धकाः कांग्रेसया नेतातय्सं तःगु अडानयात एकीकृत माओवादी व एमालेया नेतातय्सं सहमति मबीवं कांग्रेसं संसद न्ह्याके बीमखु धकाः अडान काःगु खःसा अनं लिपा सुचं तिकाः संसदया बैठक थौं तकया निंतिं स्थगित याःगु खः ।
एकीकृत माओवादी व एमालेलिसे शान्ति प्रक्रियाया बारे सहलह ब्याकेगु धकाः न्हापा हे क्वःछिनातःगु थौंया बैठक नेपाली कांग्रेसं बहिष्कार याःगु दु। उगु बैठकय् मवँसे कांग्रेसया नेतात थौं चिचीधंगु दलया नेतातय्गु बैठकय् ब्यस्त जुयाच्वंगु दु। थःपिं मेगु हे बैठकय् व्यस्त जुइमाःगु कारणं शान्ति प्रक्रियाया बैठकय् वये मलाःगु लिसः कांग्रेस नेतातय्सं बियाहःगु खः ।
