'मातृभाषाया विकल्प मातृभाषा हे तये'

येँ (सन्ध्या टाइम्स)/नेवाः विद्यार्थी दबूया न्हापांगु पिथना 'न्हूगु पलाः' स्मारिकाया वंगु शनिवाः छगू ज्याझ्वःया दथुइ शिक्षामन्त्री गंगालाल तुलाधरपाखें चिखिफ्यनेज्या जुल। दबूया अध्यक्ष रिसा श्रेष्ठया सभापतित्वय् न्ह्याःगु उगु ज्याझ्वलय् वरिष्ठ संस्कृतिविद् सत्यमोहन जोशी विशिष्ट पाहां कथं झाःगु खः ।

ज्याझ्वलय् न्ववासें मन्त्री तुलाधरं जनजाति विद्यार्थीपाखें न्ह्याकूगु पलाः प्रशंसनीय जू धासें थीथी ब्वनेकुथी ऐच्छिक रुपं तयातःगु मातृभाषाया पलेसा भाषा हे तयेगु प्रतिबद्धता प्वंकादिल। विशिष्ट पाहां सत्यमोहन जोशीं हरेक ख्यलय् सक्रिय रुपं न्ह्यायेमाःपिं विद्यार्थी हे जूगुलिं जनजातिया अस्तित्व म्वाकेया निंतिं दबूया थुगु कुतः आशावादी जूगु खँ कनादिल ।

ज्याझ्वलय् आदिवासी विद्यार्थी महासंघया अध्यक्ष नरबहादुर गुरुङ्गं न्हूगु शिक्षा नीति बारे सहलह ब्याके माःगु धासें थुकिया निंतिं सकल जनजाति विद्यार्थी छप्पँ जुइमाःगु खँ कनादिल। राजनीतिक एवं भाषिक न्ह्यलुवा राजेन्द्र श्रेष्ठं स्वनिगलय् यक्व क्याम्पसत दःसां आदिवासी नेवाःतय्गु संगठन मदुगुलिं नेवाः विद्यार्थी दबुलिं थुकिया परिपूर्ति याःगु खँ कनादिल ।

नेवाः देय् दबूया नायः नरेश ताम्राकारं दबू नीस्वंगु १४ ला दुने हे स्मारिका पिथनाः विद्यार्थी संघं सफलतापाखे थःगु पलाः न्ह्याकूगु दु धयादिल। वय्कलं नेवाः विद्यार्थी दबू धइगु नेवाः देय् दबूया हे भ्रातृ संगठन खः धासें विद्यार्थी दबूया हरेक ज्याय् नेवाः देय् दबूया ग्वाहालि दइगु प्रतिबद्धता नं प्वंकादिल ।

नेवाः देय् दबूया संरक्षक मल्ल के.सुन्दरं नेवाः विद्यार्थी दबू आदिवासी जनजातिया प्रतिनिधित्व याइगु संघया रुपय् न्ह्याः वनेमाःगु खँ कनादिल। पहिचानया राजनीतिं थाय् कयाच्वंगु इलय् नेवाः विद्यार्थी दबुलिं ७५ जिल्लाय् थःगु संस्था नीस्वना वनेमाःगु सुझाव नं वय्कलं बियादिल ।